Berkarar döwletiň täze eýýamynyň Galkynyşy döwründe döwlet we jemgyýetçilik durmuşynyň ähli ugurlarynda oňyn özgertmeler amala aşyrylýar. Eziz Diýarymyz günsaýyn ösýär hem özgerýär, hemişelik Bitarap Watanymyzyň halkara derejesindäki abraýy gün-günden belende göterilýär. Döwletimiziň oňyn Bitaraplyk syýasaty ählumumy parahatçylygy we howpsuzlygy, durnukly ösüşi üpjün edýän beýik özgertmeleri amala aşyrmaga giň mümkinçilikleri döredýär. Arkadagly Serdarymyzyň her bir tutumly işi halkymyzyň abadan durmuşynyň bähbidine gönükdirilip, ýurdumyzda ýetilýän sepgitler, beýik özgertmeler halkymyzy täze üstünliklere ruhlandyrýar.

Häzirki wagtda Türkmenistan özüniň hemişelik Bitaraplyk hukuk ýagdaýyndan gelip çykýan borçlaryna gyşarnyksyz eýermek arkaly, dünýä döwletleri we halkara guramalary bilen netijeli hyzmatdaşlygyň örüsini has-da giňeldýär. Garaşsyzlygyň ilkinji ýyllaryndan başlap, halkara hyzmatdaşlygyny ösdürmäge işjeň girişip, dünýä giňişligindäki ornuny üstünlikli pugtalandyrýan Watanymyz dünýäniň abraýly guramasy bolan Birleşen Milletler Guramasynyň ýöriteleşdirilen edaralary bilen netijeli gatnaşyklary alyp barýar. Ýurdumyzyň ählumumy ösüşiň hatyrasyna gönükdirilen oňyn häsiýetli başlangyçlary bu abraýly gurama tarapyndan uly goldawa eýedir. Munuň şeýledigine Türkmenistanyň başlangyçlary boýunça Birleşen Milletler Guramasynyň Baş Assambleýasy tarapyndan kabul edilen, dürli görnüşli möhüm halkara meseleleriň çözülmeginde uly ähmiýete eýe bolan Kararnamalar hem doly şaýatlyk edýär.

Türkmenistan döwletimiz halkara hyzmatdaşlygynyň çäklerinde ählumumy parahatçylygyň we howpsuzlygyň üpjün edilmegine, durnukly ykdysady ösüşiň gazanylmagyna mynasyp ýardam berýär. Bu ugurda ýurdumyz halkara başlangyçlaryň ençemesi bilen çykyş edip, sebit we dünýä ähmiýetli iri taslamalary durmuşa geçirdi. Şu jähetden, Türkmenistan bu gün Merkezi Aziýa we Hazar deňziniň sebitinde halkara ulag geçelgeleriniň döredilmegi ugrunda netijeli gatnaşyklary ösdürýän we energetika howpsuzlygyny üpjün etmäge çalyşýan döwlet hökmünde ykrar edilendir.

1995-nji ýylyň 12-nji dekabry ýurdumyzyň taryhy senenamasyna altyn harplar bilen hemişelik ýazyldy. Şol gün Birleşen Milletler Guramasynyň Baş Assambleýasynyň 50-nji mejlisinde, bu Gurama gatnaşyjy 185 döwletiň biragyzdan goldamagy netijesinde «Türkmenistanyň hemişelik Bitaraplygy» hakynda ýörite Rezolýusiýa kabul edildi. Bu taryhy waka türkmen halkynyň gadymy döwürlerden bäri eýerýän, onuň ruhy baýlygyna, taryhy we milli däp-dessurlaryna laýyk gelýän parahatçylyk söýüjilik, ynsanperwerlik we açyklyk ýörelgelerine esaslanýar. Ýurdumyzyň alyp barýan oňyn Bitaraplyk syýasaty halkara giňişliginde uly ähmiýete we ösüşlere eýedir. Türkmenistanyň hemişelik Bitaraplyk hukuk ýagdaýy tutuş dünýäde uly goldawa mynasyp bolýar.

Munuň aýdyň mysaly hökmünde, 2015-nji ýylyň 3-nji iýunynda BMG-niň Baş Assambleýasynyň 69-njy mejlisinde 193 döwletiň biragyzdan goldamagy hem-de 47 döwletiň awtordaş bolmagy bilen «Türkmenistanyň hemişelik Bitaraplygy» atly Rezolýusiýanyň gaýtadan kabul edilendigini görkezip bileris. Bu resminamanyň kabul edilmegi bilen, BMG ýene-de Türkmenistanyň hemişelik Bitaraplyk ýagdaýyny goldaýandygyny beýan etdi. Bitaraplyk ýörelgesi ata-babalarymyzyň durmuşynda gadymdan gelýän ähli meseleleri diňe ylalaşyk esasynda amal etmegi bilen baglanyşyklydyr. Konstitusiýamyzyň 2-nji maddasynda: «Türkmenistanyň hemişelik Bitaraplygy onuň içeri we daşary syýasatynyň esasy bolup durýar» diýlip kesgitlenmegi wajyp ähmiýete eýedir.

Öz saýlap alan parahatçylyk söýüjilikli syýasatyny dabaralandyrýan döwletimiz dünýäniň iň uly abraýly guramasy bolan BMG-niň uzak möhletleýin hyzmatdaşy bolmak bilen, öz üstüne alan borçnamalaryny yzygiderli ýerine ýetirip, öňde goýlan durnukly ösüşiň maksatlarynyň dünýäde amala aşyrylmagyna oňaýly goşant goşjakdygyny görkezýär. Uzak geljegi nazarlap, hemişelik Bitaraplyga esaslanýan, daşary syýasatymyzyň özeni bolup durýan hoşniýetlilik, ynsanperwerlik ýaly häsiýetleriň halkymyzyň gadymdan gelýän ýol-ýörelgesidigi buýsandyryjydyr.

Belli bolşy ýaly, oňyn dünýägaraýyş, BMG-niň Tertipnamasyna we halkara-hukuk kadalaryna yzygiderli ygrarlylygymyz Türkmenistanyň gatnaşmagynda amala aşyrylýan halkara taslamalarynda doly beýanyny tapýar. Şolaryň maksady diňe bir täjirçilik we ykdysady bähbit bilen däl-de, eýsem, döwletleriň ýakynlaşmagyny üpjün etmek hem-de olaryň arasyndaky gatnaşyklarda ynanyşmak we aýdyňlyk ýagdaýyny döretmek islegi bilen şertlendirilendir. Bu bolsa, öz nobatynda, ýurtlaryň arasyndaky ykdysady gatnaşyklaryň giňeldilmegine, halkara ykdysady hyzmatdaşlykda açyklyk we ynanyşmak ýörelgeleriniň iş ýüzünde amala aşyrylmagyna ýardam eder.

Türkmen Bitaraplygy özüniň gelip çykyşy, many-mazmuny boýunça özboluşly bolup, goňşy döwletler bilen ysnyşykly we parahatçylykly ýaşamak türkmen halkymyza ata-babalarymyzdan miras galan oňyn häsiýetlerdir. Hemişelik Bitaraplyk hukuk ýagdaýy, ilki bilen, Türkmenistanyň parahatçylyk söýüjilikli daşary syýasaty durmuşa geçirmegini, ähli döwletler bilen gatnaşyklaryny deňhukuklylyk, özara hormat goýmak ýaly ýörelgelerden ugur alýandygy, harby bileleşiklere gatnaşmaýandygyny, daşary syýasat işinde beýleki döwletleriň bähbitlerini çäklendirmeýändigini aňladýar.

Berkarar döwletiň täze eýýamynyň Galkynyşy döwründe Türkmenistan döwletimiz Gahryman Arkadagymyzyň başlangyjy bilen, Arkadagly Serdarymyzyň taýsyz tagallasy netijesinde abraýly halkara guramalary bilen gatnaşyklary ösdürmekde örän wajyp işleri amala aşyrýar. Türkmenistan birnäçe halkara guramanyň agzasy bolup, dünýä döwletleriniň ençemesi bilen diplomatik gatnaşyklary ýola goýdy. Häzirki wagtda bagtyýar halkymyz hormatly Prezidentimiziň başda durmagynda hemişelik Bitaraplygymyzyň şanly toýuny ýokary derejede bellemäge uludan taýýarlyk görýär. Halkymyzy parahatçylygyň aýdyň ýoly bilen öňe alyp barýan hormatly Prezidentimiziň dünýäde dost-doganlygy we hoşniýetli gatnaşyklary berkarar edýän ynsanperwerlik syýasaty dowamat dowam bolsun!

Maýsa AŞYROWA,
Türkmenistanyň Inžener-tehniki we ulag kommunikasiýalary institutynyň Ykdysadyýet we dolandyryş fakultetiniň Logistika hünäriniň 2-nji ýyl talyby.