Milli ykdysadyýetimiziň häzirki ýeten sepgitleri barada söz açmak ýüreklerimizde buýsanç duýgusyny oýarýar. Arkadagly Serdarymyzyň öňdengörüjilikli başlangyçlarynyň netijesinde, şeýle-de ýurdumyzda edilýän her bir işiň häzirki döwrüň talaplaryna kybap gelmegini gazanmak babatda öňe sürýän pikirleriniň esasynda milli ykdysadyýetimiziň pudaklary günsaýyn özgerdilýär. Bu işleri amal etmäge, häzirki zaman ösüşiň zerur şertlerini gurnamaga ukyply bolan ýurdumyz ähli babatda önümçilik, işjeňlik kuwwatyny has-da güýçlendirmegiň geljekki maksatnamalaryny yzygiderli işläp taýýarlaýar.

Soňky ýyllaryň netijeleri bilen öňki iş dolandyrylyşynyň arasyndaky tapawudyň örän uludygyny görmek bolýar. Mysal üçin, soňky ýyllarda tehnologiýanyň köpgyraňly, täze önümleri bilen adamzadyň durmuşy örän ýeňilleşdi, adamlaryň gündelik işine sarp edýän wagty köp derejede tygşytlandy. Munuň esasynda durýan dolandyryş ulgamynyň çäginde hyzmatlaryň sany barha artdy. Bu milli ykdysadyýetimiziň ähli pudaklary babatda hem şeýle. Olaryň elektron resminama dolanyşygyny öz işleriniň baş ugruna öwürmegi netijesinde, birinjiden, işiň mazmunynda we ýerine ýetirilişinde amatlyklar döredi, ikinjiden bolsa, raýatlarymyz elektron resminama dolanyşygynyň, sanly ulgamyň mümkinçilikleriniň amala aşyrylmagy bilen her günki durmuşymyzda has çuňňur ornaşýar.

Häzirki sanly ykdysadyýete geçiş döwründe täze programmalaryň, her pudagyň öz resmi saýtynyň döredilmegi, Sanly.tm milli elektron poçtamyzyň, tmchat messenjeriniň, uly ýeňillikli hyzmatlaryň ýörite internet goşundylarynyň köp sanly görnüşiniň ulanylyşa girizilmegi bilen maglumat üpjünçiligimiz, şol sanda oňa bolan isleglerimiz artdy. Sanlylaşdyrmagyň köptaraplaýyn bähbitlerini nazara alýan hormatly Prezidentimiz bu möhüm işe köpçülikleýin çemeleşilmegini esasy talap hökmünde öňde goýýar. Bu bolsa häzir ýurdumyzyň ähli ulgamlarynda giňden alnyp barylýar.

Diýarymyzyň edara-kärhanalarynyň düzüminde zähmet çekýän hünärmenlere, işçilere hem sanly ulgamyň döredýän şertlerinden peýdalanmagy başarmak yzygiderli öwredilýär we bu iş barha özleşdirilýär. Bu halkymyzyň her bir nesliniň bitewülikde döwrebap aňly-düşünjeli jemgyýeti kemala getirmeginde wajypdyr. Halkymyzyň, türkmen jemgyýetiniň ýaşaýyş-durmuşynyň has-da gowulanmagynyň bähbidine şunuň ýaly tagallalary edýän Gahryman Arkadagymyzyň hem-de Arkadagly Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Ýakupbaý ÝANGIBAÝEW,
Türkmenistanyň Inžener-tehniki we ulag kommunikasiýalary institutynyň Jemagat infrastrukturasy we inženerçilik ulgamlary fakultetiniň 4-nji ýyl talyby.