Sanly bilim ulgamy ykdysadyýetiň möhüm bölekleriniň biridir. Ýurdumyzyň ýokary we ýörite orta okuw mekdeplerinde hem sanly ulgamy ornaşdyrmakda uly öňegidişlikler gazanylýar. Bilim edaralarynda sanly ykdysadyýeti ösdürmäge gönükdirilen wezipeleri ýerine ýetirmekde, ylym-bilimiň, innowasiýalaryň netijeliligini ýokarlandyrmak, ylmy-barlag işleriniň ykdysady bähbitliligini artdyrmak boýunça toplumlaýyn işler alnyp barylýar.

Hereket edýän ulgamyň ýerli toruna müňden gowrak kompýuter, printer, ýöriteleşdirilen tehniki enjamlar birikdirilendir. Bu bolsa maglumat tehnologiýalaryny giňişleýin ornaşdyrmaga, peýdalanmaga amatly şert döredýär. Bu maglumat ulgamy birnäçe terebaýt ölçegi eýelemek bilen, onda professor mugallymlarymyzyň türkmen dilinde taýýarlan okuw kitaplarynyň, gollanmalarynyň, şeýle hem umumy we amaly okuwlaryň ýazgylary, daşary ýurtlarda neşir edilen edebiýatlaryň elektron görnüşleri, sapaga degişli wideoşekiller, animasiýalar, suratlar jemlenendir. Maglumatlar dersler boýunça tertipleşdirilendir. Şeýle hem, institutymyzda elektron kitaphana-da hereket edýär.

Kitaphanamyzyň gaznasy ylmy-tehniki neşirlerinden, okuw kitaplardan, çeper edebiýatlardan, syýasy-jemgyýetçilik,  gazet-žurnallardan  ybarat.  Kitaphananyň  gaznasy  Türkmenistanyň  Bilim ministrliginiň  “Bilim”  Merkezi bazasyndan  alynýan syýasy,  çeper, okuw kitaplary   bilen  yzygider doldurylýar. Kitaphanada talyplaryň okamaklary üçin ähli zerur şertler döredilen. Ýokary okuw mekdebimiziň okuw we ylmy-barlag işlerinde maglumat - kitaphana üpjünçiligi:ulanyjylara okalgalarda we kitap sargyt edilýän otaglarda resminamalar we elektron çeşmeler, elektron resurslar we maglumat-bibliografiki hyzmatlar, bilimiň we neşirleriň dürli görnüşleri boýunça netijeli hyzmat etmek;ulanyjylara maslahat bermek, sargytlaryň ähli görnüşlerini ýerine ýetirmek;hyzmatlar, kitaphananyň çeşmeleri we hyzmatlaryň tizlenmegi, şeýle hem bilim, innowasiýa we ylmy işleriň maglumat goldawy barada maglumat bermek maksady bilen, institutyň fakultetleri, kafedralary we ylmy-barlag işlerini alyp barýan bölümleri bilen özara gatnaşygy saklamak;mugallymlaryň, hünärmenleriň, alymlyk derejesine dalaşgärleriň we aspirantlaryň şahsy maglumat hyzmatlary; kitaphana täze gelip gowşan, kitaphanada ozal bar bolan elektron çeşmeler, olary ulanmak üçin ygtyýar almagyň tertibi barada maglumat bermek;beýleki kitaphanalardan resminamalary elektron görnüşde bermek we maglumat goruny ulanmak hyzmatlary.

Elektron kitaphanalar kitaphana işinde gabat gelýän: neşirleriň az mukdarda çap edilenligi, maglumatlary saklar ýaly meýdanyň ýetmezçiligi, kitaplaryň aýawly saklanylmagy ýaly meseleleriň hem çözgüdini ýeňilleşdirýär. Bulardan başga-da ýiten, zaýalanan kitaplary, resminamalary täzeden dikeltmek mümkinçiliklerini  döredýär. Bu bolsa elektron kitaphanalardan kitaplary, maglumatlary dürli görnüşde almagyň  elýeterligini üpjin edýär. Türkmenistanyň Döwlet energetika institutynyň kitaphansynda hem elektron neşirleriň sany gün-günden köpelýär. Ýokary okuw mekdebimiziň  mugallymlarydyr talyplary institutymyzyň we paýtagtymyzdaky beýleki kitaphanalaryň baý edebi gorundan giňişleýin peýdalanýarlar. Kitaphanalardaky elektron kitaplary  özleriniň ýan kompýuterlerine, elektron maglumat göterijilere ýükläp alyp, islendik pursatda olardan peýdalanýarlar.

Garaşsyz, hemişelik Bitarap Watanymyzda innowasiýa işiniň ýerlikli hem-de döwrebap gurnalmagy we ösdürilmegi netijesinde  halkymyzyň hususan-da ýaşlaryň bilim almak, ylym öwrenmek mümkinçiliikleri barha ýokarlanýar.Berkarar Diýarymyzda halkymyza, aýratyn-da, biz ýaşlara halal zähmet çekmäge, döwrebap bilim almaga ähli mümkinçilikleri döredip berýän Gahryman Arkadagymyza, Arkadagly Gahryman Serdarymyza jan saglyk, uzak ömür arzuw edýäris!

Täjigül ÝUSUPOWA,
Beki Seýtäkow adyndaky Mugallymçylyk mekdebiniň 3-nji ýyl talyby.