Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda amala aşyrylýan beýik işler halkymyzyň eşretli durmuşynyň binýadyny berkidýär. Il-ýurt bähbitli tutumly işler Arkadagly Serdarymyzyň Watana hem ene topraga söýgüsiniň beýikdigini äşgär edýär. Ýurdumyzyň bedew batly şol ösüşleridir özgerişleri kalbyňy joşa getirip, il-halkyň eşretli durmuşyny üpjün edýän Arkadag Prezidentimize buýsanjymyzy artdyrýar.

Arkadag Serdarly bagtyýar ýaşlar ýylynda ýurdumyzyň esasy baýramlarynyň biri bolan baky Bitaraplygymyzyň şanly 28 ýyllygyny zähmet ýeňişlerimiz bilen garşy almaga taýýarlanýarys. Çünki 1995-nji ýylyň 12-nji dekabrynda Birleşen Milletler Guramasynyň Baş Assambleýasynyň ýörite Kararnamasy esasynda dünýä bileleşiginiň agza döwletleri tarapyndan Türkmenistana hemişelik Bitaraplyk hukuk derejesiniň biragyzdan berilmegine sanlyja günlerden 28 ýyl dolýar. Watanymyza bu derejäniň berilmegi, ýurdumyzyň parahatçylyk söýüjilik daşary syýasat ugrunyň, onuň halkara işlerindäki ornunyň ykrar edilmegidir. Bitaraplyga eýe bolan günümizden başlap döwletimiz üçin täze döwür başlandy. Turuwbaşdan bu wakanyň bir döwletiň çäklerinden çykyp, parahatçylyk döredijilik babatda bütin sebitde, dünýäde möhüm waka öwrülendigini bellemek gerek.

Baky Bitarap Türkmenistan indi dünýä ýurtlarynyň arasynda ýokary depginler bilen ösýän, öz halkyny abadan edýän döwletleriň hatarynda ynamly gadam urýar. Türkmenistan beýleki döwletler bilen dostluk, birek-biregi hormatlamak, birek-birege ynam etmek, özara ýardam bermek esasynda gatnaşygyny ösdürýär we köp ýurtlar bilen hyzmatdaşlyk, söwda-ykdysady gatnaşyklary saklaýar. Oňyn Bitaraplyk ýörelgelerine esaslanyp, işjeň durmuşa geçirilýän «Açyk gapylar» syýasaty, halkara kadalaryna laýyklykda daşary ýurt maýa goýumlarynyň goralmagynyň üpjün edilmegi, şeýle hem ýurdumyzyň iňňän baý tebigy serişdeleri, amatly geosyýasy ýagdaýy, syýasy durnuklylyk, ýurdumyzyň ykdysadyýetiniň daşary ýurt maýa goýujylaryny birsyhly özüne çekýänligi oňyn netijelerini berýär.

Milli Liderimiziň hem-de hormatly Prezidentimiziň baştutanlygynda türkmen döwleti uly üstünliklere eýe bolýar. Türkmenistan bütin dünýäde we sebit möçberinde söwda-ykdysady hyzmatdaşlygy ösdürmek meselelerinde daşary ýurt maýasyny, tehnologiýasyny, tejribesini ýurduň ykdysadyýetine giňden çekmek arkaly beýleki ýurtlar bilen hoşniýetli, dostlukly hyzmatdaşlygy ýola goýýar.  Türkmenistanyň dünýä bileleşigine işjeň goşulmagy, ençeme döwletler bilen söwda-ykdysady we ynsanperwer-medeni gatnaşyklaryň giňemegi, halkara maslahatlaryň, sergileriň, festiwallaryň geçirilip durulmagy ýurdumyzyň häzirki zaman ösüşine kuwwatly itergi berýär we onuň bütin dünýädäki abraýyny belende göterýär.

Türkmenistan Bitarap döwletleriň hataryna goşulmak bilen, öz üstüne birnäçe borçnamalary aldy. Ýurdumyz umumadamzat gymmatlyklaryna we demokratiýanyň ýörelgelerine eýermek, ýurduň içinde raýat asudalygyny üpjün etmek, Birleşen Milletler Guramasy we beýleki halkara guramalary bilen ýakyn hyzmatdaşlykda bolup, öz syýasatyny ýöretmek ýaly borçlary öz üstüne aldy we berjaý edýär. Türkmenistan sebitde we bütin dünýäde asudalygyň, abadançylygyň, parahatçylygyň rowaçlanmagyna mynasyp goşant goşýar.

Hormatly Prezidentimiziň alyp barýan öňdengörüjilikli hem-de adalatly içerki hem daşarky syýasaty adamzadyň kalbyna şugla saçýar, sebitde we bütin dünýäde parahatçylygyň binýadynyň berkidilmegine oňyn täsirini ýetirýär. Türkmen halkyny parahat, eşretli döwletde ýaşadýan, ýurdumyzy gülledip ösdürýän belent mertebeli Gahryman Arkadagymyzyň hem-de Arkadagly Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin! 

Zaman GELDIÝEW,
Türkmenistanyň Inžener-tehniki we ulag kommunikasiýalary institutynyň Jemagat infrastrukturasy we inženerçilik ulgamlary fakultetiniň Gozgalmaýan emläkleriň ekspertizasy we dolandyrylyşy hünäriniň 1-nji ýyl talyby.