Berkarar döwletiň täze eýýamynyň Galkynyşy döwründe Türkmenistan döwletimiz hemişelik Bitaraplyk hukuk ýagdaýyndan gelip çykýan borçlaryna gyşarnyksyz eýermek arkaly, dünýä döwletleri we halkara guramalary bilen netijeli hyzmatdaşlygyň gerimini has-da giňeldýär. Bilşimiz ýaly, 1995-nji ýylda BMG-niň Baş Assambleýasynda «Türkmenistanyň hemişelik Bitaraplygy» Rezolýusiýasy şol wagt gurama degişli bolan 185 döwlet tarapyndan biragyzdan goldanylan bolsa, 2015-nji ýylda 193 döwlet tarapyndan biragyzdan kabul edildi. Bu bolsa ýurdumyzyň daşary syýasat ugruna dünýä jemgyýetçiligi tarapyndan uly ynam bildirilýändiginiň subutnamasydyr.

Türkmenistanyň hemişelik Bitaraplyk syýasatyny saýlap almagynyň esasy sebäpleriniň biri-de mähriban Watanymyzyň geosyýasy ýagdaýy we bu ugurdaky ykdysady bähbitleridir. Ýurdumyzyň çäginiň Aziýany we Ýewropany birleşdiriji merkez bolup durýandygy sebäpli ulag-üstaşyr mümkinçilikleriniň giň gerimde ösdürilmegine ýardam berýär. Şeýle-de Türkmenistan döwletimiz beýleki döwletler bilen dostluk, birek-birege hormat goýmak, ynanyşmak, özara ýardam bermek esasynda halkara derejesindäki gatnaşyklaryny ösdürýär we köp ýurtlar bilen hyzmatdaşlyklary, söwda-ykdysady gatnaşyklary işjeň alyp barýar. Bu bolsa türkmen bitaraplygynyň dünýä nusgalyk häsiýetleriniň biridir.

Ata-babalarymyzyň arzuwlan Garaşsyzlyk eýýamynyň gelmegi halkymyzyň başyny göge ýetirdi, Bitaraplyk bolsa köňül arzuwyny gülletdi. Garaşsyz, hemişelik Bitarap ýurdumyz ylalaşygyň, parahatçylygyň we halklaryň arasyndaky dostlugyň merkezine öwrüldi. Türkmenistan döwletimiz beýleki döwletler bilen dostluk, birek-biregi hormatlamak, birek-birege ynam etmek, özara ýardam bermek esasynda gatnaşygyny ösdürýär we köp ýurtlar bilen hyzmatdaşlyk, söwda-ykdysady gatnaşyklaryny saklaýar. Türkmenistanyň hemişelik Bitaraplygy sebitde halkara hyzmatdaşlygynyň we goňşuçylyk gatnaşyklarynyň ösmegine itergi berdi.

Hormatly Prezidentimiziň başda durmagynda Watanymyz BMG-niň münberinden dünýä ýüzüne hemmetaraplaýyn bähbitli başlangyçlaryny öňe sürýär. Arkadagly Serdarymyzyň parasatly baştutanlygynda «Açyk gapylar» syýasaty esasynda halkara kadalaryna laýyklykda daşary ýurt maýa goýumlarynyň goralmagynyň kepillendirilmegi, daşary ýurt telekeçiligi üçin amatly şertleriň döredilmegi, şeýle hem ýurdumyzyň iňňän baý tebigy serişdeleriniň, ýurdumyzyň ykdysadyýetiniň daşary ýurt maýa goýujylaryny özüne çekýänligi oňyn netijelerini berýär.

Arkadagly Serdarymyzyň parasatly baştutanlygynda halkymyzyň milli ýörelgeleriniň we hemişelik Bitaraplyk hukuk ýagdaýynyň ajaýyp sazlaşygy halkymyza parahatçylyga uzaýan ýoluň aýdyň geljegini görkezýär. Bitaraplyk we hoşniýetli goňşuçylyk ýörelgeleri bilen utgaşýan bu gatnaşyklar parahatçylykly hem-de durnukly ösüşi üçin amatly şertleri üpjün etmek bilen, Türkmenistanyň Merkezi Aziýa sebitinde eýeleýän ornuny yzygiderli berkidýär. Şunuň bilen baglylykda sebitiň möhüm meselelerini bilelikde, tagallalary utgaşdyryp çözmek, ýurdumyzyň diplomatiýasynyň möhüm ileri tutulýan ugry bolup durýar.

Mähriban halkymyzy ýetip gelýän şanly sene – hemişelik Bitaraplygymyzyň 28 ýyllygy bilen tüýs ýürekden gutlaýarys. Bu şanly senä zähmet sowgatlary bilen barmak hyjuwy bilen joşýan bagtyýar raýatlarymyza we halkymyza bagtyýarlyk eçilen Gahryman Arkadagymyza hem-de Arkadagly Serdarymyza jan saglyk, uzak ömür, il-halkymyz, galyberse-de umumadamzat bähbitli tutumly işleriniň hemişe rowaç bolmagyny arzuw edýäris!

Kerem TEJENOW,
Türkmenistanyň Inžener-tehniki we ulag kommunikasiýalary institutynyň Jemagat infrastrukturasy we inženerçilik ulgamlary fakultetiniň Gozgalmaýan emläkleriň ekspertizasy we dolandyrylyşy hünäriniň 1-nji ýyl talyby.