Berkarar döwletiň täze eýýamynyň Galkynyşy döwründe Arkadagly Serdarymyzyň parasatly baştutanlygynda hemişelik Bitaraplyk hukuk ýörelgeleriniň üstünlikli durmuşa geçirilmegi netijesinde Türkmenistan Watanymyz Merkezi Aziýada we tutuş dünýäde durnuklylygyň oňyn ýagdaýyny emele getirmek bilen sebitde möhüm orny eýeleýär.

Türkmen bitaraplygy ykdysady hem-de geosyýasy ugurlarynyň sebitleýin ösüşine oňyn täsir edýär. Hemişelik Bitaraplyk hukuk derejesi türkmen döwletiniň daşary syýasat strategiýasynyň esasy ýörelgeleriniň biri bolmak bilen, Berkarar döwletimiziň bagtyýarlyk döwründe bedew bady bilen okgunly ösüşlerimiziň möhüm şertidir, goňşy we beýleki döwletler bilen netijeli hyzmatdaşlygymyzy giňeltmäge ýardam berýän hadysadyr. Hemişelik Bitaraplygymyzyň 28 ýylynyň içinde Watanymyz ykrar edilen parahatçylyk dörediji merkez hökmünde belent halkara abraýyna eýe boldy.

Garaşsyz Türkmenistanyň durmuşa geçirýän parahatçylyk söýüjilikli daşary syýasatynyň dünýäde giňden dabaralanmasy hökmünde halkymyzyň hakydasynda ebedilik orun alan Bitaraplyk ýurdumyzyň şanly taryhynda gazanan iň uly üstünlikleriniň biridir. 1995-nji ýylyň 12-nji dekabrynda Birleşen Milletler Guramasynyň Baş Assambleýasy tarapyndan «Türkmenistanyň hemişelik Bitaraplygy» Rezolýusiýasy kabul edilip, 185 döwletiň biragyzdan goldamagynda ýurdumyz bu gurama tarapyndan ykrar edilen ýeke-täk hemişelik Bitarap döwlet boldy.

Türkmenistan Watanymyzyň giň halkara hyzmatdaşlygyna ygrarly bolmagy, ilkinji nobatda, belent mertebeli Liderimiziň alyp barýan oňyn daşary syýasatynyň dabaralanmagy netijesinde gazanylýar. Taryhy tejribäniň görkezişi ýaly, islendik döwletara gatnaşyklarynyň netijeliligi halklaryň arasyndaky özara düşünişmek we ynanyşmak ýagdaýynyň, olaryň dostlukly we özara bähbitli hyzmatdaşlygynyň pugtalandyrylmagy bilen kesgitlenilýär.

Milli Liderimiziň parasatly baştutanlygynda ýurdumyzyň dünýäniň abraýly halkara guramalary, şol sanda Birleşen Milletler Guramasy bilen hyzmatdaşlygy barha giň gerime eýe bolýar. Şunuň bilen baglylykda, Durnukly Ösüşiň maksatlaryny gazanmak ýaly ileri tutulýan ugurlarda netijeli gatnaşyklar barha pugtalandyrylýar. Bu babatda Türkmenistanyň sebit we dünýä howpsuzlygy, energetika, ulag-aragatnaşyk, ekologiýa ýaly möhüm ugurlarda özara bähbitli halkara hyzmatdaşlygyny ösdürmek bilen bagly döredijilikli başlangyçlarynyň ähmiýeti has hem artýar.

Şeýle hem Türkmenistan howanyň üýtgemegi we daşky gurşawy goramak meseleleri boýunça BMG bilen hyzmatdaşlyga uly ähmiýet berýär. Biziň ýurdumyz geçen ýyl Fransiýanyň paýtagtynda geçirilen Howa baradaky halkara maslahatynda «Pariž ylalaşygyna» gol çekişip, Aşgabatda Merkezi Aziýada we Hazar sebitinde howanyň üýtgemegi bilen bagly tehnologiýalar boýunça sebit merkezini açmak bilen bagly we başga-da birnäçe anyk başlangyçlar bilen çykyş etdi.

2015-nji ýylda Birleşen Milletler Guramasynyň 193 döwletiniň goldamagy netijesinde «Türkmenistanyň hemişelik Bitaraplygy» atly Rezolýusiýanyň ikinji gezek ykrar edilmegi hormatly Prezidentimiziň sebit we dünýä möçberinde parahatçylygy, howpsuzlygy we durnukly ösüşi üpjün etmäge gönükdirilen netijeli syýasatynyň ählumumy ykrar edilmeginiň ajaýyp subutnamasydyr.

Gahryman Arkadagymyzyň belleýşi ýaly, Türkmenistan oňyn Bitaraplygyň esasy ýörelgelerinden ugur almak bilen, sebitiň we dünýäniň halklarynyň bähbidine işjeň daşary syýasaty amala aşyrýar, halkara hukugyň umumy ykrar edilen kadalaryna, deňhukuklylyk, birek-birege hormat goýmak, hoşniýetli goňşuçylyk hem-de özara bähbitli hyzmatdaşlyk ýörelgelerine eýermek bilen, halkara giňişlikde mynasyp ornuny eýeleýär.

Sebitde we dünýäde parahatçylygy pugtalandyrmak boýunça Gahryman Arkadagymyzyň we Arkadagly Serdarymyzyň alyp barýan il-ýurt bähbitli, umumadamzat ähmiýetli başlangyçlarynyň mundan beýläk hem diňe rowaçlyklara beslenmegini arzuw edýäris! Milli baýramymyz — hemişelik Bitaraplygymyzyň şanly 27 ýyllyk baýramy bilen bütin türkmen halkyny mähirli gutlaýarys!

Annaguly ATAÝEW,
Türkmenistanyň Inžener-tehniki we ulag kommunikasiýalary institutynyň Ykdysadyýet we dolandyryş fakultetiniň 3-nji ýyl talyby.