Arkadagly Serdarymyzyň parasatly baştutanlygynda batly depginler bilen gülläp ösýän Watanymyzda ýaşlar syýasatynyň barha dabaralanýandygy hem buýsanç bilen bellenilmäge mynasypdyr. Ata Watanymyzda ýurdumyzyň bilim ulgamyny kämilleşdirmek, türkmen ýaşlaryny dünýä ülňülerine laýyk gelýän kämil, giň dünýägaraýyşly, Watansöýüji ýaşlar edip ýetişdirmek döwrümiziň öňde goýýan wezipeleriniň esasyny düzýär.

Türkmenistanyň Inžener-tehniki we ulag kommunikasiýalary instituty hem hormatly Prezidentimiziň döredip beren ähli şertlerinden netijeli peýdalanýan, ýokary derejeli inženerleri we tehnologlary taýýarlaýan döwrebap ýokary okuw mekdebidir. Olaryň hemmesinde binagärlik we inženerçilik desgalaryň kommunikasiýalarynyň sazlaşykly we takyk işlemegi üçin zerur enjamlar hem-de gözegçilik ulgamlar bilen enjamlaşdyrylan ýörite tehniki toplum göz öňünde tutulandyr.

Berkarar döwletiň täze eýýamynyň Galkynyşy döwründe ýurdumyzyň ulag we kommunikasiýa pudagynda häzirki zaman ösen tehnologiýalar işjeň ornaşdyrylýar. Türkmenistanyň Inžener-tehniki we ulag kommunikasiýalary institutynda hem sanly ykdysadyýeti ornaşdyrmakda uly öňegidişlikler gazanylýar. Institutyň kafedralarynda sanly ykdysadyýeti ösdürmäge gönükdirilen wezipeleri ýerine ýetirmekde, ylym-bilimiň, innowasiýalaryň netijeliligini ýokarlandyrmak, ylmy-barlag işleriniň ykdysady bähbitliligini artdyrmak boýunça toplumlaýyn işler alnyp barylýar. Ýokary okuw mekdebinde gurnalan ýerli kompýuter tory ähli bölümleri özünde birleşdirip, ýokary derejeli maglumat aragatnaşygyny amala aşyrmaga mümkinçilik berýär.

Ylmy tejribe bilen utgaşdyrmak talyplaryň alan bilimlerini önümçilikde ulanmak başarnyklaryna eýe bolmak mümkinçiliklerini artdyrýar. Institutyň mugallymlarynyň alyp barýan tutanýerli işleri hem-de talyplaryň bilim almakdaky erjelligi ýaşlarymyzyň döwletiň ykdysady ösüşlerine özleriniň goşantlaryny goşjak hünärmenler bolup ýetişjekdiklerine ynam bildirmäge esas berýär. Bilimiň many-mazmunyny baýlaşdyrmak, hilini dünýä derejesine laýyk getirmek maksady bilen, sanly bilim ulgamy ösdürilýär. Şu ulgamda ylmyň soňky gazananlary we okatmagyň innowasion usullary giňden ornaşdyrylýar. Ýaşlaryň döwrebap hünärleri ele almaklaryna, nazary bilimlerini kämilleşdirmeklerine, iş başarnyklaryny ýokarlandyrmaklaryna, sanly tehnologiýalary öwrenmeklerine ýardam bermek meselelerine döwlet syýasatynyň ileri tutulýan ugurlarynyň biri hökmünde garalýar.

Berkarar döwletiň täze eýýamynyň Galkynyşy döwründe ýaşlar syýasaty milli kanunçylygyň çäklerinde hem-de umumy ykrar edilen kadalaryň esasynda üstünlikli amala aşyrylýar. Häzirki zaman dünýäsiniň syýasy, ykdysady we durmuş şertlerinde ýaşlar diňe bir döwletimiziň uzak geljegi nazarlaýan ösüşlerinde strategik güýç bolmak bilen çäklenmän, eýsem, halkara gatnaşyklarda hem möhüm orny eýeleýärler. Şunuň bilen baglylykda ýaş, kalby joşgundan doly we işe, okuwa, ylma-bilime yhlasly ýaşlaryň dünýä dillerini öwrenmeklerine aýratyn üns berilýär. Şol maksatlar dünýä we sebit abadançylygynyň gülläp ösmegine gönükdirilendir.

Türkmen halkynyň nurana ertirleriniň eýeleri bolan şu günki nesillerimiziň döwrebap bilimli, Watanymyza wepaly, ata-babalarymyzyň mizemez ruhuna mynasyp, edep-terbiýeli bolup ýetişmekleri ugrunda Gahryman Arkadagymyzyň, Arkadagly Serdarymyzyň alyp barýan döwletli işleriniň hemişe üstünliklere beslenmegini tüýs ýürekden arzuw edýäris!

Saparmyrat ANNADURDYÝEW,
Türkmenistanyň Inžener-tehniki we ulag kommunikasiýalary institutynyň Mehanika-tehnologik fakultetiniň 3-nji ýyl talyby.