Berkarar döwletiň täze eýýamynyň Galkynyşy döwründe Ata Watanymyzyň gülläp ösmegi, ýurdumyzyň asuda, halkymyzyň agzybir durmuşda ýaşamagy üçin Arkadagly Serdarymyzyň durmuşa geçirýän ykdysady, syýasy we medeni özgertmeleri, türkmeniň milli buýsanjy bolan ajaýyp halylarymyzyň taryhy köklerini öwrenmek barasyndaky alyp barýan taýsyz tagallalary bizi diýseň buýsandyrýar.

Halyçylyk hünäri ussat gelin-gyzlarymyz tarapyndan sünnälenip, sungat derejesine ýetirildi. Hünäre ussat bolmak üçin başarnyk, zehin, ukyp gerek. Ýöne ukyp-başarnygyň, zehiniň ýeterlik bolaýanda-da, türkmen halysy ýaly sungaty döretmek örän kyndyr. Täsin galdyrýan owadan halylary dokaýan zenanlaryň döredijilik ukybyny görenler haýran galýarlar. Bu barada Türkmenistanyň Halk Maslahatynyň Başlygy, türkmen halkynyň Milli Lideri Gurbanguly Berdimuhamedowyň “Janly rowaýat” atly kitabynda gyzykly maglumatlar berilýär. Bu kitapda haly gölleriniň nagyşlarynyň manysy hakynda hem giňden gürrüň edilýär. Täsin nagyşlar halyçynyň pähim-paýhasy, oý-pikirleri bilen dünýä inýär. Haly ýöne bir gözelligiň nusgasy bolmak bilen çäklenmän, eýsem, gaýtalanmajak sungat eseridir.

Halyçylyk sungatymyzyň uzak geçmişden gözbaş alyp gaýdýandygy taryhy hakykatdyr. Arheologik gazuw-agtaryş işleri geçirilende halkymyzyň örän gadymy wagtdan bäri haly sungaty bilen meşgullanyp gelendigini tassyklaýan maglumatlara duş gelindi. Agzalan maglumatlary 1949-njy ýylda Daglyk Altaýyň Pazyryk depesinde geçirilen gazuw-agtaryş işleriniň netijeleri hem tassyklaýar. Bu ýerdäki gadymy guburlar barlananda milli halylarymyzyň ýüze çykarylmagy türkmen halysynyň köküniň müňýyllyklara uzaýandygyny subut edýär. Tapylan halydaky üýtgemeýän reňkleriň oýlanyp tapylmagy halyçylyk sungatynyň gadymy döwürlerde hem halkymyzyň esasy hünärleriniň biri bolandygyny aýdyňlygy bilen görkezýär.

Ol Daglyk Altaýdaky buzluklaryň arasynda saklanyp galypdyr. Halynyň käbir ýerleri zaýalanan hem bolsa, esasy bölegi biziň günlerimize gelip ýetipdir. Onuň düşegine sugunlaryň, bürgüt ganatly ýolbarslaryň, atlaryň şekili çitilipdir. Gadymy halynyň gyrasyndaky guýrugy düwlen bedewler hem türki halklarda yzygiderli duş gelýän şekilleriň biridir.

«Arkadag Serdarly bagtyýar ýaşlar» ýylynda türkmen halylarynyň şeýle nepisligi hormatly Prezidentimiziň “Janly rowaýat”, “Arşyň nepisligi” atly ajaýyp kitaplarynyň içinden eriş-argaç bolup geçýär. Haly sungatymyzy dünýä ýüzüne ykrar edýän Gahryman Arkadagymyzyň hem-de Arkadagly Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Arzygül TÄJOWA, 
Türkmenistanyň döwlet energetika institutynyň 1-nji ýyl talyby.