Arkadagly Serdarymyzyň ýurdumyzyň döwlet gurluşyny, hukuk ulgamyny kämilleşdirmek, jemgyýetçilik durmuşyny demokratiýalaşdyrmak bilen baglanyşykly öňe süren başlangyçlary ata-babalarymyzyň asyrlaryň dowamynda kemala getiren, adalatlylyga, deňlige, halallyga, ynsanperwerlige ýugrulan, bahasyna ýetip bolmajak tejribesini özünde jemleýär.

Ýurdumyzyň dürli künjeklerinde gurulýan beýik binalar, täze-täze desgalar, ýaşaýyş jaýlary — bularyň hemmesi ykdysady ösüşimiziň örän ýokarydygynyň görkezijisidir. Şeýle ösüşler halkymyzyň bagtyýar durmuşyny üpjün etmäge gönükdirilendir. Garaşsyz, hemişelik Bitarap Türkmenistanda adamyň bagtyýar durmuşy, halkyň abadançylygy baş wezipeleriň biridir. Şu nukdaýnazardan Berkarar döwletiň täze eýýamynyň Galkynyşy döwründe durmuş maksatly beýik işler amala aşyrylýar.

Gahryman Prezidentimiz Serdar Berdimuhamedow şeýle belleýär: «Häzirki döwürde Garaşsyz Türkmenistan öz ösüşiniň täze tapgyryna gadam basdy. Bu döwür «Berkarar döwletiň täze eýýamynyň Galkynyşy» diýlip atlandyryldy. Ösüşiň şu täze döwründe biz öz öňümizde has belent maksatlary goýduk». Ynha, şu belent maksatlaryň her birinde halkymyzyň, eziz Watanymyzyň bähbitlerini görmek bolýar. Ösüşiň döwrebap mümkinçiligini üpjün edýän şeýle döwletli maksatlarda şu günüň we geljegiň esasy ugry kesgitlenendir, ýurdumyzyň ykdysady kuwwatynyň has-da pugtalandyrylmagy göz öňünde tutulandyr.

Milli Liderimiz ýaşlara örän uly ynam bildirýär. Şol belent ynam bu günki gün durmuşymyzyň ähli ugurlarynda aýdyň duýulýar. Şu ýylyň «Pähim-paýhas ummany Magtymguly Pyragy» diýlip atlandyrylmagy şol synmaz ynamyň has-da belent derejä göterilmegidir, ýurdumyzy mundan beýläk-de gülledip ösdürmekde Beýik akyldaryň öwüt-nesihatlaryna baglanylýandygynyň, agzybir halkymyzyň beýik işlerine, uly üstünliklerine garaşylýandygynyň alamatydyr.

Gahryman Arkadagymyzyň ýol-ýörelgesini dowam etdiriji Gahryman Arkadagly Prezidentimize belent wezipesinde uly üstünlikleriň ýar bolmagyny arzuw edýäris. Biz bagtly eýýamyň bagtyýar ýaşlary hormatly Prezidentimiziň töweregine berk jebisleşip, ösüşiň täze belentliklerine tarap uly ynam bilen öňe gitmekde baky bitewi güýje öwrüleris, türkmeniň at-abraýynyň, şan-şöhratynyň mizemezdigini tutuş dünýä doldurarys.

Ahmet ABDYREÝIMOW,
Türkmenistanyň Inžener-tehniki we ulag kommunikasiýalary institutynyň Ykdysadyýet we dolandyryş fakultetiniň 2-nji ýyl talyby.