Berkarar döwletimiziň bagtyýarlyk döwründe gahryman arkadagymyzyň parasatly baştutanlygynda ýurdumyzyň ulag ulgamy gün günden kämilleşýär. Häzirki  wagtda ulgamy döwrüň talabyna laýyk ösdürmek, has-da döwrebaplaşdyrmak, sanly bilim ulgamyna geçmek boýunça öňde goýulýan wezipeler toplumlaýyn çözülýär.

Ýurdumyzyň ykdysadyýetiniň täze innowasion ugurlarynda, senagatda, logistikada ykdysady gatnaşyklarynda, ylmy-tehnologik we maýa goýum gatnaşyklarynda döwrebap maksatnamalaryň amala aşyrylmagy ykdysadyýetimiziň ösüşlerine uly itergi berýär. Dünýäniň çarýanyna uzaýan ýerüsti we howa ýollarynyň birnäçesiniň welaýatlarymyzyň çäginden gözbaşyny alýandygyny we zerur bolan döwrebap menzilleriň gurlandygyny görkezmek bolar. Bu bolsa häzirki zaman ulag-kommunikasiýa düzümini döretmäge uly goşant boldy.

Türkmenistanyň ykdysady strategiýasynda kesgitlenilen wezipeleriň üstünlikli ýerine ýetirilmeginde kämil ulag  düzüminiň ähmiýeti örän ýokarydyr. Ulgamyň üsti bilen dünýä bilen ýakyn gatnaşyk etmegiň we özara bähbitli hyzmatdaşlygy ösdürmegiň amatly şertleri üpjün edilýär. «Türkmenistanyň Prezidentiniň ýurdumyzy 2019 — 2025-nji ýyllarda durmuş-ykdysady taýdan ösdürmegiň Maksatnamasyny» durmuşa geçirmek bilen halkara hyzmatdaşlygyň geriminiň giňelmegine hem öz täsirini ýetirýär.

Ulaglar pudagynyň tehniki düzümi hem baýlaşdyrylýar. Ýakynda hormatly Prezidentimiziň Özbegistan Respublikasyna saparynyň dowamynda hem iki ýurduň arasynda ulag aragatnaşygyny ýokarlandyrmaga aýratyn üns berlip, taraplar howa gatnawlaryny tapgyrlaýyn täzeden dikeltmegi, 2022-nji ýyl üçin özara nyrh ýeňilliklerini işläp düzmek barada ylalaşdylar. Türkmenbaşy halkara deňiz portunyň infrastrukturasyny ulanmagyň geljegini mundan beýläk-de ösdürmek üçin bilelikdäki çäreleri işläp düzmek we kabul etmek boýunça birnäçe işler alynyp barylýar.

Türkmenistanyň ulag-ýol düzümini giňeltmek ugrundaky tagallalary sebitde giňden goldaw tapýar. Ulag-aragatnaşyk düzüminiň giňeldilmegi ýurdumyzyň eksport kuwwatynyň pugtalanmagyna hem ýardam edýär. Ulag-kommunikasiýa ulgamynyň sanlylaşdyrylmagy bilen hyzmatlaryň hili ýene-de yzygiderli ýokarlanýar, olaryň görnüşleri artýar, üstaşyr daşalýan ýükleriň möçberleri köpelýär. Sanly dolandyryş ulgamlarynyň ornaşdyrylmagy bilen ulaglaryň ähli görnüşleriniň hereketiniň hakyky wagt birliginde awtomatlaşdyrylan tertipde dolandyrylmagynda giň mümkinçilikler açyldy.

Hormatly Prezidentimiziň yzygiderli tagallalary esasynda ulag ulgamynyň ösdürilmegi hem-de bu ugurda halkara hyzmatdaşlygyň ýaýbaňlanmagy ýurdumyzyň ösüşleriniň ygtybarly kepili bolup durýar. Türkmenistan Ýewraziýa giňişliginde strategik durnuklylygyň möhüm merkezi hökmünde tanalmak bilen, gyzyklanma bildirýän ýurtlaryň ählisi üçin ygtybarly hyzmatdaş hem-de şol bir wagtyň özünde yklymara ähmiýetli ulag-üstaşyr merkezi hökmünde wajyp orny eýeleýär. Şu nukdaýnazardan, ýurdumyzyň çäginde we ondan daşarda dostluk ýollarynyň gurulmagy Türkmenistanyň multimodal logistika ulgamynyň ösüşiniň möhüm tapgyryny alamatlandyrýar.

Biz ― ulag  pudagynyň  ýaş hünärmenleri şeýle iri halkara transmilli ulag-üstaşyr geçelgelerini durmuşa geçirmäge döredilýän giň mümkinçilikler üçin hormatly Prezidentimize  tüýs ýürekden hoşallyk bildirýäris. Gahryman Arkadagymyzyň jany sag bolsun, maksatlary myrat tapsyn!Arkadag Prezidentimiziň tutuş adamzadyň bähbidine alyp barýan işleri mundan beýläk hem rowaçlyklara beslensin!

Möwlam HAÝTGULYÝEW,
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenawtoulaglary» agentliginiň   “Lebapawtoulag” önümçilik birleşiginiň hünärmeni.