Parahatçylygy pugtalandyrmak bilen halkara gatnaşyklaryna giň gerim berýän Türkmenistan hemişelik Bitaraplyk hukuk ýagdaýyna doly laýyklykda,şeýle hem sebitde we bütin dünýäde emele gelen ýagdaýy nazara almak bilen giň göwrümli we aýdyň maksatly beýik işleri maksada laýyk durmuşa geçirýär. Bu bolsa, Türkmenistana goňşy we beýleki döwletler bilen ynanyşmak esasynda syýasy, söwda-ykdysady, gumanitar ugurlar boýunça alyp barýan gatnaşyklaryny has-da pugtalandyrmaga hem-de ösdürmäge giň mümkinçilik berýär.

Parahatçylygy baýdak edinýän ýurdumyz bilen uzak möhletli we köpugurly gatnaşyklary ýola goýmaga bildirilýän gyzyklanmalar barha artýar. Parahatçylyga, agzybirlige, birek birege ynam halkymyzyň gadymdan gelýän ýol ýörelgesidir. Bütin adamzadyň naýbaşy  arzuwlaryna,beýik maksatlaryna öwrülen parahatçylyk we ynanyşmak halkymyzyň müňlerçe ýyl dowam edip gelýän ynsanperwer häsiýetleriniň içinden eriş argaç bolup geçýär. Bu ynsanperwer häsiýetler türkmen halkynyň häsiýetli aýratynlygyna öwrülip gidipdir. Parahatçylygy goramak — ata-baba däbimiz, bizi beýik halk derejesine çykaran ynsanperwer ýol ýörelgämiz. Gahryman Arkadagymyzyň parasatly belleýşi ýaly, şu häsiýet, ýol ýörelge biziň ýurdumyzyň hemişelik Bitaraplyk syýasatynyň esasynda durandyr.

Eziz Diýarymyzyň hemişelik Bitaraplyk hukuk ýagdaýyna eýe bolmagy halkymyzyň müň ýyllyklardan gözbaş alyp gaýdýan şanly taryhy we asyrlaryň dowamynda toplan baý medeni mirasy bilen şertlendirilýär. Gadymy döwürlerden bäri kämil  medeniýete eýe bolan Türkmenistan elmydama dünýäniň ösüşine uly goşant goşup geldi. Ählumumy parahatçylygy, howpsuzlygy we durnukly ösüşip ugtalandyrmak işinde Türkmenistan iri, abraýly halkara guramalary, ozaly bilen, Birleşen Milletler Guramasy, onuň düzüm bölekleri bilen hyzmatdaşlyga aýratyn ähmiýet berýär.

Hemmämize mälim bolşy ýaly, Gahryman Arkadagymyzyň başlangyjy bilen Birleşen Milletler Guramasynyň Baş Assambleýasy şu ýyly “Halkara parahatçylyk we ynanyşmak ýyly” diýip yglan etmek baradaky Kararnamany kabul etdi. Gahryman Arkadagymyzyň bu parasatly başlangyjy ýurdumyzyň ýöredýän «Açyk gapylar» syýasatynyň hemme taraplaýyndygyny, netijeli özgertmeleriň Türkmenistanyň durmuş-ykdysady taýdan sazlaşykly ösüşine, dünýädäki hojalyk gatnaşyklarynyň ählumumy ulgamyna ynamly goşulyşmagyna gönükdirilendigini äşgär görkezýär.

Bitarap döwletimiziň halkara giňişligindäki öňe sürýän,geljegiň ählumumy ösüşini nazara almakda ýola goýýan döwletara gatnaşyklara gönükdirilen netijeli ädimleri buýsanç bilen bellärliklidir.Türkmenistanyň başlangyçlarynyň dünýä bileleşigi tarapyndan uly goldawa we ykrarnama eýe bolýandygy Berkarar döwletimiziň bagtyýarlyk döwründe has-da aýdyň ýüze çykýar.Türkmen halky häzirki taryhy döwürde dünýäniň ähli ýurtlarynyň we halklarynyň oňyn ösüşiniň bähbidine belent işleri amala aşyrýar. Ýurdumyz häzirki zamanyň möhüm meseleleriniň çözgüdine täzeçil ýörelgeleri ynamly öňe sürýär we olary durmuşa geçirýär.

Dünýäde “Halkara parahatçylyk we ynanyşmak ýyly” şygaryny göterýän bu ýyl taryhy özgertmelerimiziň,beýik ösüşlerimiziň üstünlikli dowam edýän, eziz Diýarymyzyň şöhratynyň arşa göterilýän, parahatçylygyň hem-de ynanyşmagyň rowaçlanýan ýyly bolup buýsanjymyza buýsanç goşýar.

Ajaýyp zamanamyzda bütin türkmen halkynyň abadançylykda, bolelinlikde ýaşamagy, erkana zähmet çekmegi üçin dynuwsyz alada edýän milli Liderimiziň jany sag, beýik başlangyçlary mundan beýläk-de rowaç bolsun!

Ýagmyr BEKIÝEW,
Türkmenistanyň telekommunikasiýalar we informatika institutynyň mugallymy.

Abuna tassyklaýyş kody: 34812