Garaşsyz, hemişelik Bitarap Türkmenistan sebit we dünýä derejesinde parahatçylygyň, durnuklylygyň we howpsuzlygyň berkidilmegine öz goşandyny goşup gelýär. Hususan-da, sebitiň döwletleri bilen ysnyşykly we köptaraply gatnaşyklary ösdürmek ýurdumyzyň daşary syýasy strategiýasynyň esasy ýörelgesi bolup durýandygyny bellemek gerek. Şol ýörelgeleriň düýp esasynda Türkmenistanyň hemişelik Bitaraplyk syýasaty durandyr. Birleşen Milletler Guramasynyň Baş Assambleýasy tarapyndan «Türkmenistanyň hemişelik Bitaraplygy» atly Kararnamanyň iki gezek, ýagny 1995-nji hem-de 2015-nji ýyllarda kabul edilmegi ýurdumyzyň halkara hukuk ýagdaýynyň dünýäde giňden goldanylýandygynyň subutnamasydyr.

Mälim bolşy ýaly, 2025-nji ýyl Türkmenistan üçin möhüm ýyllaryň biri bolar. Şunda uly şanly seneleri — Türkmenistanyň hemişelik Bitaraplygynyň 30 ýyllygyny hem-de ýurdumyzyň başlangyjy bilen Birleşen Milletler Guramasynyň Baş Assambleýasynyň degişli Kararnamasyna laýyklykda, 2025-nji ýylyň “Halkara parahatçylyk we ynanyşmak ýyly” diýlip yglan edilendigini aýratyn bellemek gerek. Şunuň bilen baglylykda, 2024-nji ýylyň 24-nji sentýabrynda geçirilen Türkmenistanyň Halk Maslahatynyň taryhy mejlisiniň netijeleri boýunça Halkara parahatçylyk we ynanyşmak ýyly bilen bagly dabaralaryň we çäreleriň ýokary derejede, guramaçylykly geçirilmegini üpjün etmek maksady bilen döredilen guramaçylyk komitetiniň ýolbaşçylygynda Türkmenistanda we daşary ýurtlarda halkara çäreleri hyzmatdaşlar bilen bilelikde mynasyp derejede geçirmek üçin ähli zerur işleriň alnyp baryljakdygyna üns çekildi.

Döwletimiziň taryhynyň şöhratly sahypalary şanly Garaşsyzlyk, şöhratly Bitaraplyk döwri bilen baglanyşykly. Çünki ýurdumyz özbaşdak ösüşiň milli ýolunda ähli ugurlarda görlüp-eşidilmedik ösüşleri gazanýar. Hemişelik Bitaraplyk döwletimiziň köp ugurlardaky ösüşleriniň gözbaşy bolup, halkara giňişliginde abraýyny artdyrýar we Türkmenistan dünýäniň gülläp ösýän ýurtlarynyň hatarynda öz mynasyp ornuny tapýar.

Türkmenistan sebitde syýasy durnuklylygy saklamak, hoşniýetli goňşuçylygy, dostlukly hyzmatdaşlygy ösdürmek işinde abraýly halkara guramalar, ilkinji nobatda Birleşen Milletler Guramasy bilen işjeň hyzmatdaşlygy alyp barýar. Türkmenistan 1992-nji ýylyň 2-nji martynda Birleşen Milletler Guramasynyň agzalygyna kabul edildi we bu abraýly guramanyň çäklerinde özüniň ählumumy parahatçylygy we howpsuzlygy berkitmäge gönükdirilen derwaýys başlangyçlary bilen uly abraýa eýe boldy.

2007-nji ýylyň 10-njy dekabrynda Türkmenistanyň paýtagty Aşgabatda Merkezi Aziýa üçin Öňüni alyş diplomatiýasy boýunça sebit merkeziniň açylmagy özara bähbitli hyzmatdaşlykda gazanylan taryhy ähmiýetli sepgitleriň biri boldy. Şeýle hem, BMG-niň Baş Assambleýasy tarapyndan 2017-nji we 2021-nji ýyllarda «Birleşen Milletler Guramasynyň Merkezi Aziýa üçin öňüni alyş diplomatiýasy boýunça sebit merkeziniň orny» atly Kararnamalaryň kabul edilmegi Merkezi Aziýada sebit hyzmatdaşlygynyň berkemeginiň hem-de bu işde sebit döwletleriniň Aşgabatdaky merkeze ýokary baha berýändikleriniň ýüze çykmasydyr. Umuman aýdanymyzda, Öňüni alyş diplomatiýasy Türkmenistanyň baky Bitaraplygynyň iň wajyp wezipesi we aýrylmaz bölegi bolup çykyş edýär.

Ýurdumyzyň daşary syýasat ugrunyň dünýä jemgyýetçiligi tarapyndan makullanmagy ähli ýurtlar we iri halkara guramalar bilen netijeli hyzmatdaşlyk etmekde mäkäm binýat bolup durýar. Hemişelik Bitaraplyk döwletimiziň öz ykbalyny we geljegini özüniň gülledip ösdürmegine, dünýädäki beýleki döwletler bilen bir hatarda, goňşy ýurtlarymyzyň arasynda ikitaraplaýyn we köptaraplaýyn özara bähbitli gatnaşyklary ýola goýmagyna mümkinçilik berýär.

Hemişelik Bitarap Türkmenistan dünýäniň köpsanly ýurtlary bilen netijeli hyzmatdaşlyk edýär, bütin dünýäde parahatçylygyň, asudalygyň, halklaryň arasynda dost-doganlygyň dabaralanmagyna uly goşant goşýar. Döwletimiziň örän oýlanyşykly daşary syýasaty dünýäniň möhüm sebitleriniň biri bolan Merkezi Aziýada howpsuzlygyň, abadançylygyň, durnuklylygyň berkemegine ýardam edýär.Şu ýylyň 16-njy maýynda BMG-niň Baş Assambleýasynyň 77-nji sessiýasynyň 70-nji plenar mejlisinde Türkmenistanyň başlangyjy bilen hem-de Milletler Bileleşigine agza 67 döwletiň biragyzdan goldamagynda her ýylyň 26-njy noýabry «Bütindünýä durnukly ulag güni» diýlip yglan edilmegi hem biziň döwletimiziň bu ugurda amala aşyrýan işlerine dünýä bileleşigi tarapyndan uly baha berilýändiginiň özboluşly dabaralanmasydyr. Bu gün Türkmenistanyň ulag diplomatiýasy Durnukly ösüş maksatlaryna ýetmäge itergi berýän möhüm şertleriň biri bolup, dünýä döwletlerini we yklymlaryny birleşdirýär.

Oňyn Bitaraplyk, parahatçylyk söýüjilik, hoşniýetli goňşuçylyk ýörelgelerini öňe sürýän Türkmenistan dünýä döwletleri bilen parahatçylykly, özara bähbitli, deňhukukly gatnaşyklaryň ösdürilmegine uly goşant goşmak bilen, türkmen diplomatiýasynyň gazananlaryny dünýä äşgär edýär.

Başymyzyň täji Garaşsyzlyk we Bitaraplyk halkymyzyň bagtynyň çüwmegidir, bagtyýar geljeginiň güwäsidir. Hemişelik Bitaraplyk Berkarar döwletiň täze eýýamynyň Galkynyşy döwründe ýurdumyzy has-da gülledip ösdürmek we öňde goýlan belent wezipeleri üstünlikli durmuşa geçirmek ugrunda yhlas bilen zähmet çekýän halkymyza mizemez ynam hem ruhubelentlik berýär. Şeýle bolansoň, döwlet Baştutanymyzyň daşyna mäkäm jebisleşen halkymyz ösüşli ýollarda beýik işleri bitirip, ajaýyp döwrüň hözirini görüp ýaşaýar.

Ähli üstünliklerimiziň sakasynda duran Arkadagly Gahryman Serdarymyzyň halkymyzyň bagtyýar şu güni hem-de geljegi ugrunda alyp barýan beýik işleri mundan beýläk-de üstünliklere beslensin. Türkmen halkynyň Milli Lideri Gahryman Arkadagymyzyň, Arkadagly Gahryman Gahryman Serdarymyzyň janlary sag, ömürleri uzak bolup, il-ýurt bähbitli döwletli işleri has-da rowaç alsyn!

 Jeren MURADOWA,
Beki Seýtäkow adyndaky Mugallymçylyk mekdebiniň mugallymy.