Bilim ýaş nesli terbiýelemek we okatmak babatda şahsyýetiň, jemgyýetiň, döwletiň isleglerini kanagatlandyrmaga esaslanýan maksatlaýyn hem ulgamlaýyn işleriň binýadydyr. Döwlet Baştutanymyz ýurduň ykdysady taýdan ösüşiniň ileri tutulýan ugurlaryny kesgitläp, iň täze tehnologiýalaryň halk hojalygynyň ähli pudaklarynyň ösüşiniň özeni bolmalydygyny nygtaýar. Şunuň bilen baglylykda, milli ýörelgelere we dünýäniň ösen tejribesine laýyklykda, soňky ýyllarda ýurdumyzyň ýokary okuw mekdeplerinde ykdysady bilimleri öwretmek boýunça alnyp barylýan işler has-da ilerleýär.

Häzirki wagtda bilim ulgamynda amala aşyrylýan giň gerimli özgertmeler milli ykdysadyýetimizi döwrebaplaşdyrmak işleri bilen hem aýrylmaz baglanyşyklydyr. Ykdysady ugurlar boýunça bilim alýan ýaşlaryň häzirki zaman bilimini, jemgyýetçilik durmuşyndaky ähli üýtgeşmeleridir özgerişleri öz wagtynda öwrenip, tiz, mynasyp we döwrebap netije çykarmagy möhüm talapdyr. Çünki milli ykdysadyýetde çeýe pikirlenmäge ukyply, çalt çözgüt kabul edip bilýän kämil hünärmenlere aýratyn isleg bildirilýär. Zähmet bazarynda bäsdeşligiň ýokarlanmagy we soňky ýyllarda adam maýasyna bolan islegleriň ýüze çykmagy olaryň ukyp-başarnyklaryna bolan talaplary esasy wezipe edip goýýar. Şunda ykdysady hünärlerden bilim alýan talyplaryň döwrebap derejede kämilleşmegi zerurdyr.

Türkmen döwlet maliýe instituty hem milli ykdysadyýetimiziň pudaklarynda zähmet çekjek ykdysatçy hünärmenleri taýýarlaýar. Bu ýerde döwrüň talaby bolup çykyş edýän bilim bermegiň halkara derejeli iki basgançagynda — bakalawr we magistr derejesinde iş ýöredilip, ol eýýäm birnäçe ýyl bäri hojalyk hasaplaşygynda hereket edýär. Sapaklar döwrebap enjamlaşdyrylan okuw otaglarynda okadylyp, talyplara elektron kitaphana we internet merkezi elýeterli edilen. Olaryň geçilýän temalary içgin öwrenmekleri, halkara derejede onlaýn görnüşde geçirilýän bäsleşiklere, maslahatlara we hünär kämilleşdiriş okuwlaryna teleköprüler arkaly gatnaşmaklary üçin ähli şertler döredilen. Saýlap alan ugruna baglylykda, käbir sapaklar iňlis dilinde-de okadylýar. Şunuň ýaly döwrebap şertleriň döredilmegi talyplara ösen döwletleriň ykdysady ýagdaýy bilen has içgin tanyşmaga, olaryň täzeçil usullarydyr taglymatlary milli ykdysadyýetimiziň pudaklaryna ornaşdyrmaga gatnaşmaklaryna mümkinçilik berýär.

Hormatly Prezidentimiziň baştutanlygynda ylym-bilim ulgamynda durmuşa geçirilýän döwrebap özgertmeler üstünlikli dowam etdirilip, bu babatda Garaşsyzlyk ýyllarynda toplanan tejribeden, döwrüň ösüşinden we talaplaryndan ugur alnyp, ulgamy kämilleşdirmäge uly üns berilýär. Türkmen döwlet maliýe institutynyň professor-mugallymlary hem geljekde milli ykdysadyýetimiziň pudaklarynda zähmet çekjek, döwrebap pikirlenip, tiz, iň amatly çözgütleri kabul etmäge ukyply, döwrüň sesine ses goşup bilýän ýokary bilimli hünärmenleri kemala getirmegi maksat edinýärler.

Biz — ýaşlar okamaga, hünär öwrenmäge we eziz Watanymyzyň ösüşlerine goşant goşmaga döredilen mümkinçilikler üçin Gahryman Arkadagymyza we Arkadagly Serdarymyza tüýs ýürekden hoşallygymyzy bildirýäris. Eziz Watanymyza, il-günümize, türkmen halkynyň Milli Liderine we hormatly Prezidentimize ak ýürekden hyzmat etjek hünärmenler bolup ýetişjekdigimize ynandyrýarys.

 Amangeldi AMANLYÝEW,
Türkmen döwlet maliýe institutynyň 4-nji ýyl talyby.