Bilim ýaş nesli terbiýelemek we okatmak babatda şahsyýetiň, jemgyýetiň, döwletiň isleglerini kanagatlandyrmagy maksat edinýän maksatlaýyn we ulgamlaýyn işiň binýady bolup durýar. Türkmenistanyň «Bilim hakynda» Kanunynyň rejelenen görnüşiniň kabul edilmegi hem bu ulgamyň kämilleşdirilmegine we döwrebap talaplara laýyk getirilmegine uly ünsüň gönükdirilýändigine şaýatlyk edýär. Häzirki döwürde bu ugra sanly bilim ulgamy giňden ornaşdyrylýar.

Arkadagly Gahryman Serdarymyz ýaşlar bilen duşuşan wagty ýurtda alnyp barylýan işler we öňde duran meýilnamalar barada olar bilen söhbetdeş bolýar. Hormatly Prezidentimiz «Ýaşlar mähriban halkymyzyň, eziz Watanymyzyň beýik geljegini gurujylardyr, jemgyýetimiziň işjeň bölegidir. Eziz Diýarymyzyň güýç kuwwaty, abraý mertebesi we aýdyň geljegi bolan ýaşlar biziň alyp barýan işlerimize, ýurdumyzyň ösüşlerine mynasyp goşant goşýarlar» diýip ýaşlarymyza, olaryň alyp barýan işlerine guwanýandygyny paýhasly belleýär. Ýaşlar eziz Diýarymyzyň halk hojalygynyň ähli pudaklarynda netijeli zähmet çekýärler. Telekeçilik bilen meşgullanýan ýaşlara goldaw bermek hemde olary bu işe höweslendirmek ugrunda ýurdumyzda uly tagallalar edilýär.

Gahryman Arkadagymyz ruhy ahlak gymmatlyklary we maksatlary durmuş syýasatynyň esasy wezipesi edip goýýar. Olaryň üstünlikli durmuşa geçirilmegi ýurdumyzy ösdürmekde aýgytly şert bolup durýar. Bu örän möhüm işde jemgyýetiň ruhy durmuşynyň we her bir adamynyň içki dünýäsiniň baýlaşmagynda, ýaşlarda belent ahlak häsiýetleriň kemala gelmeginde türkmen halkynyň özboluşly milli medeniýetiniň orny uludyr. Çünki, ýurdumyzda geçirilýän özgertmeleriň rowaçlanmagynyň, halkyň mundan beýläkde abadan durmuşda ýaşamagyny üpjün etmegiň köp derejede ýaşlaryň akyl-paýhasyna, ukybyna, döredijilikli zähmetine we ylhamyna baglydyr. Hormatly Prezidentimiziň Garaşsyz, hemişelik Bitarap Watanymyzda ylmy ösüşlere giň ýol açmagy, bilim ulgamyny hasda kämilleşdirmek ugrunda amala aşyrýan netijeli we düýpli işleri gelejegimiz bolan ýaşlar baradaky beýik işlerdir. Bu beýik işler «Garaşsyz, baky Bitarap Türkmenistan — bedew batly at-myradyň mekany» ýylynda ata Watanymyzyň bedew bady bilen ösmegine, öňe, diňe öňe gitmegine badalga berýär.

Häzirki döwürde adam zähmetiniň häsiýeti we tehnologik mazmuny döredijilik, ukyp-başarnyk, edep-ekram ýaly düzüm birlikleriniň umumylaşmagynyň hasabyna baýlaşýar. Akyl zähmeti bilen fiziki zähmetiň arabaglanyşygy pugtalanýar. Elektron-kompýuter tehnologiýalarynyň döwrebap görnüşleriniň önümçilige çekilmegi işgärleriň umumy we ýörite biliminiň, medeniýetiniň ösmegi bilen utgaşýar. Önümçiligi guramagyň, dolandyrmagyň elektron-kompýuter meýilnamalaşmagy we maglumatlaşmagy, sanly ykdysadyýete geçilmegi önümçiligiň ähli düzüm birlikleriniň tehniki we tehnologiýa esasyny özgerdýär. Şonuň üçin bilim edaralarynda okuwlaryň sanly bilim esasynda guralmagy bilimiň yzygiderli häsiýete eýe bolmagyny, ýaşlaryň hünär taýýarlygynyň kämilligine oňyn täsir edýär.

Biz maglumatlaryň durmuşymyza barha giňden ornaşýan, sanly ösüşleriň yzygiderli üýtgäp duran jemgyýetinde ýaşaýarys. Smartfon durmuşymyzdaky hemişelik hemramyza öwrüldi, uzakdan buýruk bermek esasynda dürli enjamlary herekete getirýäris. Şeýlelikde, sanly özgertmeler — bu diňe bir tehnologiýa däl-de, ilki bilen durmuşy ýagdaýa öwrülýär we mekdep bilimi ulgamynda hem giňden öwrenilmegini talap edýär. Şonuň üçin-de, sanly bilimiň mekdebe täsiri barada aýdylanda, gürrüňiň diňe bir mekdep tagtasynyň interaktiw tagtalaryna, okuw kitaplarynyň noutbuklara ýa-da mekdep üçin «bulut ulgamlaryna» we okatmagyň dolandyryş ulgamlaryna çalşyrylmagy hakynda däldigini unutmaly däldiris.

Häzirki sanly bilimiň kämilleşýän döwründe talyplary bu ugra has işjeň çekmek maksady bilen, dürli ugurlar boýunça maglumatlary toplamak, bellibir ugry çuňlaşdyryp öwretmek üçin olaryň degişli çykyşlary taýýarlamaklaryny gurnamak, sowal-jogap alyşmak, bäsleşikleri yglan etmek ýaly çäreleri geçirmek, sanly aragatnaşyk arkaly beýleki mekdepleriň okuwçylarynyň arasynda dürli bäsleşikleri guramak, sanly aragatnaşykda duşuşyklary geçirmek, ussat mugallymlaryň okuw sagatlaryny gurnamak ýaly çäreler netijeli häsiýete eýedir. Sanly aragatnaşygyň üsti bilen, bu hyzmatdaşlygy has ýygy-ýygydan we maksatlaýyn ugurlar boýunça geçirmek maksada laýykdyr.

Ýurdumyzyň bilim işgärleri ýaşlaryň kalbyna ösüşlerden-ösüşlere barýan eziz Watanymyzyň ylymly-bilimli, mynasyp eýeleri bolmalydyklary baradaky beýik ynamy guýmaga borçludyrlar. Bilim ulgamyny kämilleşdirmäge uly üns berýän, ýaş nesliň ähli taraplaýyn ösmegi ugrunda uly tagalla edýän Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Begenç AMANOW,
Myrat Garryýew adyndaky Türkmenistanyň Döwlet lukmançylyk uniwersitetiniň Kazyýet lukmançylygy we hukuk kafedrasynyň mugallymy.