Türkmen halkynyň Milli Lideri Gahryman Arkadagymyzyň beýik başlangyçlaryny mynasyp dowam edýän hormatly Prezidentimiziň aladasy bilen ýurdumyzda sport ulgamyny has-da kämilleşdirmek boýunça giň gerimli işler durmuşa geçirilýär. Türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň pähim-paýhasy, öňdengörüjiligi bilen ýurdumyzyň oňyn Bitaraplyk ýörelgesi esasynda alyp barýan daşary syýasaty dünýä jemgyýetçiligi tarapyndan giňden goldaw tapýar. Munuň şeýledigini Birleşen Milletler Guramasynyň Bilim, ylym we medeniýet meseleleri boýunça guramasynyň (ÝUNESKO) ştab-kwartirasyndan gelip gowşan hoş habar hem ýene bir gezek aýdyň tassyklaýar. Bilşimiz ýaly, Türkmenistan 2023 — 2027-nji ýyllar üçin ÝUNESKO-nyň Bedenterbiýe we sport boýunça hökümetara komitetiniň agzalygyna biragyzdan saýlanyldy.Türgenlerimiz dünýäniň dürli ýurtlarynda geçirilýän halkara ýaryşlarda üstünlikli çykyş edip, Watanymyzyň sport abraýyny artdyrýarlar. Diýarymyzda halkara derejesindäki iri ýaryşlaryň, şol sanda dünýä çempionatlarynyň yzygiderli geçirilmegi jemgyýetimizde sagdyn durmuş ýörelgeleriniň rowaçlanmagyna ýardam edýär.

Arkadagly Gahryman Serdarymyzyň ylma esaslanýan beýik başlangyçlary esasynda üstünlikli durmuşa geçirilýän toplumlaýyn sport çäreleriniň netijesinde Berkarar döwletiň täze eýýamynyň Galkynyşy döwründe sport jemgyýetiň sagdynlygynyň, nesilleriň sazlaşykly beden we ruhy taýdan ösüşiniň aýrylmaz düzümine öwrüldi. Bedenterbiýe we sport bilen yzygiderli meşgullanmak, saglygy berkitmek Garaşsyz, hemişelik Bitarap Watanymyzyň her bir raýaty üçin örän möhümdir. Döwlet Baştutanymyz paýtagtymyzyň Maslahatlar köşgünde Bilimler we talyp ýaşlar güni hem-de täze okuw ýylynyň başlanmagy mynasybetli ýaşlar bilen geçiren umumy okuw sapagynda hem bu barada durup geçdi. Gahryman Arkadagymyz ähli ugurlar boýunça özüniň gymmatly maslahatlaryny bermek bilen, sportuň ähmiýeti barada aýratyn durup geçdi. Hormatly Prezidentimiziň belleýşi ýaly, sport ynsany beden we ruhy taýdan taplaýan, dünýägaraýşyny kämilleşdirýän gymmatlykdyr.

Sport güýç-gaýratdyr, gözellikdir, sagdynlykdyr we ruhubelentlikdir. Sport hereketiniň ýyl geçdigiçe barha geljegi uly halkara we sebit merkezine öwrülýän Aşgabat şäherinde dünýä derejeli sport desgalary  – Milli Olimpiýa sport Köşgi, sportuň gyşky görnüşleri boýunça sport toplumy, Olimpiýa suw-sport toplumy, awtodromy, futbol meýdançasyny, ýeňil atletikanyň ylgaw ýodalaryny, uzynlygyna, beýikligine bökmek üçin bölümleri, tennis meýdançasyny, gimnastika ýaryşlary üçin meýdançalary we sportuň beýleki görnüşleri üçin niýetlenilen binalary özünde jemleýän köpugurly “Aşgabat” we “Olimpiýa” stadionlary hem-de Olimpiýa şäherjigi hereket edýär.  Ata Watanymyz Türkmenistanyň saglygy goraýyş we sport ulgamlarynda amala aşyrylýan bu hili giň gerimli özgertmeler biziň ýurdumyzda milli Liderimiziň saýasynda sagdyn durmuş ýörelgesiniň berk berjaý edilýändiginiň aýdyň güwänamasydyr.

Paýtagtymyzda we ýurdumyzyň sebitlerinde dünýä ölçeglerine laýyk gelýän iri sport hem-de atçylyk sport toplumlary, döwrüň talaplaryna laýyklykda enjamlaşdyrylan sport mekdepleri bina edildi.  Bir söz bilen aýdylanda, türgenleşikleri hem-de ýaryşlary geçirmek, ýokary hünärmenleri taýýarlamak, türgenleriň täze neslini terbiýelemek, Olimpiýa ätiýaçlygyny döretmek üçin ähli şertler göz öňünde tutuldy.

Goý, Türkmenistanyň sport diplomatiýasynyň üstünlikli amala aşyrylmagy ugrunda beýik işleri durmuşa geçirýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun!

Toýlymyrat DURDYMYRADOW,
Türkmenistanyň Inžener-tehniki we ulag kommunikasiýalary institutynyň Demir ýol ulaglary fakultetiniň Bedenterbiýe kafedrasynyň  mugallymy.