Şu ýylyň 31-nji oktýabrynda geçirilen Halk Maslahatynyň Prezidiumynyň mejlisinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurdumyzda bilim bermegiň usulyýetini kämilleşdirmek, ylym ulgamyny yzygiderli ösdürmek we oňa häzirki zamanyň ösen tejribesini, sanly tehnologiýalary ornaşdyrmak meselelerine aýratyn ähmiýet berilmelidigini belledi. Ýaş türkmenistanlylary ylymly-bilimli, hünärli edip ýetişdirmegiň, olaryň dünýä ylmyna çuňňur aralaşmagyna giň ýol açmagyň möhüm talap bolup durýandygyna ünsi çekip, alym Arkadagymyz bu ugurda halkara hyzmatdaşlygy mundan beýläk-de işjeňleşdirmek boýunça birnäçe anyk tabşyryklary berdi.

Mälim bolşy ýaly, milli ösüşimiziň täze tapgyrynda bilim özgertmeleri ýaşlar baradaky döwlet syýasaty bilen utgaşykly durmuşa geçirilýär. Muňa uly üstünlikler bilen tamamlanyp barýan ýylyň «Arkadag Serdarly bagtyýar ýaşlar ýyly» diýlip atlandyrylmagy we bilim ulgamynda ýetilen sepgitler aýdyň şaýatlyk edýär. Hususan-da, paýtagtymyzda, welaýat merkezlerinde, obadyr şäherlerde dünýä ülňülerine laýyk gelýän mekdeplerdir çagalar baglary, aň-bilim we döredijilik merkezleri yzygiderli gurulýar, olar döwrebap okuw tehnologiýalary, interaktiw-multimedia enjamlary bilen üpjün edilýär.

Döwlet Baştutanymyzyň gol çeken Karary bilen «Türkmenistanyň ýaşlarynyň halkara hyzmatdaşlygynyň 2023 — 2030-njy ýyllar üçin Strategiýasy» tassyklanyldy. Şeýle hem Türkmenistanyň Magtymguly adyndaky Ýaşlar guramasy Birleşen Milletler Guramasynyň Bilim, ylym we medeniýet meseleleri boýunça ýöriteleşdirilen edarasynyň — ÝUNESKO-nyň Bütindünýä Ýaşlar jemgyýetiniň agzalygyna resmi taýdan kabul edildi. Munuň özi türkmen ýaşlarynyň dünýä ýurtlarynyň ýaşlary bilen ylym-bilim, maglumat-kommunikasiýa, medeni-ynsanperwer, sport we syýahatçylyk ulgamlarynda hyzmatdaşlygynyň ösdürilmegine goşýan mynasyp goşandyna berlen ýokary bahadyr.

Häzirki wagtda ýurdumyz dünýäniň bilim giňişliginde we halkara gatnaşyklarynda örän möhüm orun eýeleýär. Bu ugurda «Türkmenistanda daşary ýurt dillerini okatmagy kämilleşdirmegiň Konsepsiýasyna» laýyklykda, dünýä dillerini bilýän ýaşlaryň täze nesli kemala geldi. Şunuň bilen baglylykda, häzirki günde möhüm meseleler babatda köptaraplaýyn gepleşikleri ösdürmekde giň gözýetimli, giň dünýägaraýyşly, düýpgöter täzeçe çemeleşmelerdir ýörelgeleri öňe sürmäge ukyply ýaşlara uly orun berilýär.

Ýakynda hormatly Prezidentimiz 27-nji dekabrda Aşgabat şäherinde, Söwda-senagat edarasynyň binasynda Arkadag Serdarly bagtyýar ýaşlar ýylyna bagyşlanan halkara ylmy-amaly maslahaty, sergileri we dabaralary ýokary derejede hem-de guramaçylykly geçirmek bilen baglanyşykly Karara gol çekdi. Iri forumyň çäginde ýylyň dowamynda özümizde hem-de daşary ýurtlarda geçirilen halkara sport ýaryşlarynda, bilim bäsleşiklerinde, olimpiadalarda ýeňiji bolanlaryň, ykdysadyýetiň dürli ugurlarynda zähmet çekip, Diýarymyzyň ösüşlerine mynasyp goşant goşan ýaşlarymyzyň gazanan üstünlikleriniň jemi jemlener. Alyp baran işlerine, gazanan netijelerine mynasyp baha berlip, olary sylaglamak bilen, geljekki uly üstünliklere ýol açylar.

 Mährijemal GURBANGELDIÝEWA,
Türkmenistanyň Inžener-tehniki we ulag kommunikasiýalary institutynyň Ykdysadyýet we dolandyryş fakultetiniň  Logistika hünäriniň 1-nji ýyl talyby.