Türkmen halkynyň Milli Lideri Gahryman Arkadagymyz: «Iň gymmatly hazyna terbiýe, terbiýäniň özeni bolsa ylym-bilimdir» diýip belleýär. Ata-babalarymyz ýaş nesliň edep-terbiýesine, bilimine, beden saglygyna we ruhy kämilligine uly üns beripdir. Edep-terbiýe, ylym-bilim hemişe ynsanyň bedeninde sazlaşykda bolýar. Ylym-bilim giň umman ýaly aňyrsyna-bärsine göz ýetmeýär.

Döwrebap bilim ojagy bolan Türkmenistanyň Inžener-tehniki we ulag kommunikasiýalary institutynda ýaşlara inžener-tehniki dersleriň dürli ugurlarynda bilim berilýär. Olaryň bilim, terbiýe almaklary, hünär öwrenmekleri üçin şertler döredilendir. Arkadag Serdarly bagtyýar ýaşlar ýylynda talyp ýaşlarymyzyň ylmy döredijilikde, halkara ders we döwlet bäsleşiklerinde gazanan üstünlikleri buýsandyrýar. Institutymyzda ýola goýlan halypa-şägirtlik ýörelgesiniň ýokary derejede alnyp barylmagy bilim-terbiýe berýän mugallymlary tutanýerli zähmet çekmäge ruhlandyrýar. Arkadag Serdarly bagtyýar ýaşlar ýylynda hormatly Prezidentimiziň milli ykdysadyýetimiziň beýleki pudaklary bilen birlikde milli bilim ulgamyny döwrebaplaşdyrmak syýasatynyň çäklerinde bilim ulgamy maksatnamalaýyn esasda ösdürilýär, onuň maddy-enjamlaýyn we ylmy-usulyýet binýady yzygiderli kämilleşdirilýär.

Şu ýylyň 30-njy noýabrynda hormatly Prezidentimiz Serdar Berdimuhamedowyň sanly ulgam arkaly geçiren Ministrler Kabinetiniň nobatdaky mejlisinde ýurdumyzy durmuş-ykdysady taýdan ösdürmegiň möhüm wezipelerine seredildi. Ýurdumyzy durmuş-ykdysady taýdan ösdürmäge gönükdirilen maksatnamalarda kesgitlenen wezipelere laýyklykda, bilim edaralarynyň hereket etmeginiň şertlerini has-da kämilleşdirmek maksady bilen, bilim işine döwlet akkreditasiýasy amallaryny ornaşdyrmak boýunça degişli resminamalaryň kabul edilmegi barada işleriň alnyp barylýandygy bellenildi.

Häzirki wagtda bilim edaralarynda akkreditasiýa işi öwrenilýär. Ýurdumyzda tehniki ýokary okuw mekdeplerinde bilim alýan talyplar öz işine ökde, hünär derejesi ýokary, bilim binýady berk, zähmet endiklerine belet, ylmy-tehniki progressiň täze gazananlaryndan habarly, iş-başarjaň hünärmenlerdir. Olar jemgyýetimiziň ykdysady, syýasy, ruhy-medeni taýdan has-da ösmegine, ata Watanymyzyň dünýä ýüzündäki abraýynyň has-da belende göterilmegine itergi berýän egsilmez güýçdür.

Biz Türkmenistanyň Inžener-tehniki we ulag kommunikasiýalary institutynda bilim alýan talyplarymyza okuw derslerinden boş wagtlaryny ýerlikli peýdalanmaklary üçin innowasion taýdan dünýäniň soňky gazanan tehnologiýalary bilen enjamlaşdyrylan kompýuter, tejribe otaglarynda we beýleki otaglarda barlag işlerini, tejribe işlerini geçmegi öwredýäris. Talyplarymyzy önümçilik kärhanalarynda, okuw derslerinde tejribe işlerinde öwrenenlerini özleşdirmäge kömek edýäris.

Şu gün — 27-nji dekabrda Arkadagly Gahryman Serdarymyzyň başlangyjy esasynda Arkadag Serdarly bagtyýar ýaşlar ýylyna bagyşlanan halkara ylmy-amaly maslahaty, sergileri dabaralary geçiriler. Onda ýurdumyzda geçirilen halkara sport ýaryşlarynda, olimpiadalarda ýeňiji bolan, şeýle hem ykdysadyýetiň dürli ugurlarynda zähmet çekip, eziz Diýarymyzyň ösüşine goşant goşan ýaşlarymyzyň üstünlikleriniň jemi jemlener. Bu forum Arkadag Serdarly bagtyýar ýaşlar ýylynda özleri üçin döredilýän şert-mümkinçiliklerinden göwünleri galkynýan ýaşlaryň Watanymyzyň rowaçlygy we gülläp ösüşi ugrunda yhlas-başarnyklaryny gaýgyrmaýandyklaryny Ýer ýüzüne äşgär eder.

Türkmen ýaşlaryna ylym-bilim öwrenmäge giň mümkinçilikleri döredýän Gahryman Arkadagymyzyň, Arkadagly Gahryman Serdarymyzyň janlary sag bolsun, beýik işleri üstünliklere beslensin!

Batyr GELDIÝEW,
Türkmenistanyň Inžener-tehniki we ulag kommunikasiýalary institutynyň Jemagat infrastrukturasy we inženerçilik ulgamlary fakultetiniň Gozgalmaýan emläkleriň ekspertizasy we dolandyrylyşy hünäriniň 1-nji ýyl talyby.

Ylmy ýolbaşçy Deňizguly AŞYROW,
Türkmenistanyň Inžener-tehniki we ulag kommunikasiýalary institutynyň Çyzuwly geometriýa we inženerçilik grafikasy kafedrasynyň mugallymy.