Durmuşyň, ýaşaýşyň gözelligi ýaşlykda, ýaşlyk joşgunynda jemlenendir. Arkadag Serdarly bagtyýar ýaşlar ýyly şeýle joşgunly ýyllaryň biri boldy. Düýn paýtagtymyzda ýokary ruhubelentlikde şanly ýylyň jemlerine bagyşlanyp geçirilen halkara ylmy maslahat hem-de sergi muny aýdyňlygy bilen tassyklady. Golaýda hormatly Prezidentimiz Serdar Berdimuhamedow sanly ulgam arkaly geçiren iş maslahatynda ýaşlaryň gazanýan üstünlikleriniň örän guwandyrýandygyny belledi we «Ýaşlar — Watanyň daýanjy» atly kitabynyň çapdan çykandygyny aýtdy. Onda ýurdumyzyň ýaşlarynyň häzirki döwürde ýeten sepgitleriniň, gazanan üstünlikleriniň jeminiň jemlenýändigini nygtady.

Arkadagly Gahryman Serdarymyzyň bu kitabynyň ilkinji sanyny türkmen halkynyň Milli Lideri Gahryman Arkadagymyza sowgat hökmünde ibermegi hem türkmen halkymyzda mukaddeslige öwrülen sylag-sarpanyň, hormatyň ajaýyp görkezijisine öwrüldi. Gahryman Arkadagymyzyň «Ýaşulularyň göreldesi — ýaşlaryň ýörelgesi. Nesilleriň dowamaty — döwürleriň baglanyşygy» diýen many-mazmunly jümlelerinden mälim bolşy ýaly, ýurdumyzda ýaş nesliň mynasyp terbiýelenmegine uly ähmiýet berilýär.

Arkadagly Gahryman Serdarymyzyň Milli Liderimize ýüzlenip: «Siziň pähim-paýhasyňyzdan, öwüt-ündewleriňizden, halypalyk ýörelgeleriňizden ugur alyp, ýaşlarymyz her bir işi uly ruhubelentlik, jogapkärçilik bilen ýerine ýetirýärler. Arkadag Serdarly bagtyýar ýaşlar ýylynyň tamamlanyp barýan günlerinde men hem özümiň türkmen ýaşlarynyň durmuşyna, ykbalyna, ähli ugurlarda gazanan üstünliklerine bagyşlap ýazan «Ýaşlar — Watanyň daýanjy» atly kitabymy uly hormat bilen sowgat hökmünde Size iberýärin» diýip bellemegi, ýurdumyzda ýaşlar barada alnyp barylýan döwlet syýasatynyň gözbaşynda Gahryman Arkadagymyzyň kömek-goldawlarynyň durandygy aýratyn nygtalýar.

Bilşimiz ýaly, Arkadag Serdarly bagtyýar ýaşlar ýylynyň jemlerini alamatlandyrýan halkara ylmy-amaly maslahat we sergi şu ýylda öňdebaryjy ýaşlaryň gazanan üstünliklerini bir ýere jemledi. Bu halkara ylmy-amaly maslahatyň we serginiň çäklerinde ýaşlarymyzyň birnäçesine hormatly Prezidentimiziň, Gahryman Arkadagymyzyň adyndan sowgatlaryň gowşurylmagy dabaralaryň ähmiýetini has-da artdyrdy. Olaryň arasynda welaýatymyzdan hem ýaşlaryň bardygy diýseň begendirýär.

Ýaşlaryň durmuşynda möhüm ähmiýetli wakalar bilen şöhratlanýan Arkadag Serdarly bagtyýar ýaşlar ýylynyň uly joşguna beslenip jemlenýän günlerinde hormatly Prezidentimiziň ýaşlara bagyşlap ýazan ajaýyp kitabynyň çapdan çykmagy halkymyzyň kalbynda egsilmejek şatlygy döretdi. Hormatly Prezidentimiziň ýaşlygyň, köňüller içre ruhy joşgunynyň aýdymy bolan «Ýaşlar — Watanyň daýanjy» atly kitaby ýan kitabymyza öwrüler. Türkmen ýaşlaryna bolan buýsanjyň, olaryň gazanan ajaýyp üstünliklerine bolan guwanjyň çeper beýany bolan bu kitap ähli halkymyz bilen birlikde, ýaşlarymyzyň göwnüni galkyndyrdy, olaryň beýik geljegine bolan ynamyny berkitdi. Bu gün ata Watanymyz Türkmenistan kämil bilimli, maksada okgunly ýaşlaryň döredijilik ruhy, mynasyp goşandy bilen bedew bady bilen öňe barýar. Elbetde, hormatly Prezidentimiziň parasatly baştutanlygynda geljek ýyllarda hem ýaşlaryň durmuşynda şeýle taryhy wakalar, ajaýyp üstünlikler garaşýar. Häzirki wagtda bolsa biz — ýaşlaryň paýyna döredijilikli zähmetimiz bilen ata Watanyň şöhratly ösüşlerine mynasyp goşant goşmak ýaly belent ynama mynasyp bolmak düşýär.

Goý, biz — ýaşlara okamaga, öwrenmäge, döretmäge giň mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň janlary sag, belent başlary aman bolsun, il-ýurt bähbitli durmuşa geçirýän belent maksatlary elmydama rowaçlyklara beslensin!

 Ilmyrat REJEPOW,
Türkmenistanyň Inžener-tehniki we ulag kommunikasiýalary institutynyň  Jemagat infrastrukturasy we inženerçilik ulgamlary fakultetiniň 1-nji ýyl talyby.

Halypa mugallym Gülbahar SALAKOWA,
Türkmenistanyň Inžener-tehniki we ulag kommunikasiýalary institutynyň  mugallymy.