Berkarar Watanymyz ösüşli ýollarda okgunly öňe barýar we ähli ugurlarda guwandyryjy sepgitlere eýe bolýar. «Arkadag Serdarly bagtyýar ýaşlar ýyly» şygary astynda geçen şanly ýylyň ösüş-özgertmeleri hem şeýle diýmäge esas berýär. Tamamlanan ýylda bilim ulgamynda hem köp işler amala aşyryldy.

Arkadagly Gahryman Serdarymyzyň türkmen halkyna Täze ýyl Gutlagynda belleýşi ýaly, «Ylym-bilim bagtyýar geljegimiziň mizemez binýatlarynyň biridir. Şoňa görä-de, bu ulgamy döwrebaplaşdyrmaga, beden taýdan sagdyn, zehinli ýaş nesilleri terbiýeläp ýetişdirmäge uly ähmiýet berýäris». Garaşsyz, baky Bitarap Türkmenistanyň bagtyýar talyby hökmünde hormatly Prezidentimiziň ýaşlaryň ählitaraplaýyn sazlaşykly ösüşine berýän üns-aladalaryna örän buýsanýarys.

Bu gün ýaş nesliň daşary ýurt dillerini çuňlaşdyryp öwrenmekleri, olaryň dünýäniň iň öňdebaryjy tehnologiýalaryndan oňat baş çykaryp bilýän ýokary derejeli hünärmen bolup ýetişmekleri ugrunda bimöçber tagallalar edilýär. Bilim babatda kabul edilen kanunlar giň gözýetimli, döwrüň ruhuna laýyk derejede pikirlenýän, döwrebap tehnologiýalardan baş çykarýan, saýlan hünärine yhlasly bolan türkmen ýaşlaryny terbiýelemäge giň mümkinçilikleri açýar.

Täze ýyl baýramçylygynyň öň ýanynda geçirilen halkara ylmy-amaly maslahat hem-de ugurdaş sergi «Arkadag Serdarly bagtyýar ýaşlar» ýylynyň özboluşly jemine öwrüldi. Hormatly Prezidentimiziň tabşyrygy bilen, ýokary derejede guramaçylykly geçirilen bu foruma we köpugurly sergä ýurduň ösüşine mynasyp goşant goşýan ýaş nesliň wekilleri gatnaşdylar. Onda türkmen ýaşlarynyň döwlet dolandyryşynda tutýan orny, ýurduň daşary syýasaty, tehnologik ösüşi, ykdysady-söwda gatnaşyklaryny ösdürmek, oba hojalygy, Türkmenistanyň energetika toplumy ýaly möhüm meselelere garaldy. Ýaşlaryň ähli ugurlarda Türkmenistanyň ösüşine goşýan goşandyny açyp görkezen giň gerimli forum dürli bölümçeler boýunça ýaýbaňlandyryldy.

Ýaşlar syýasatynyň esasy ugurlarynyň biri-de halkara hyzmatdaşlygy bilen baglanyşyklydyr. Häzirki döwürde halkara guramalar, şol sanda BMG-niň ýöriteleşdirilen edaralary bilen bilelikdäki bilim taslamalary hem işjeň durmuşa geçirilýär. Bu forumyň dowamynda «UI GreenMetric World University Ranking» agentliginiň başlygy tarapyndan Türkmenistanyň ýokary okuw mekdepleriniň sekizisiniň «UI GreenMetric World University Ranking» atly halkara reýtinge goşulandygyny tassyklaýan şahadatnamanyň gowşurylmagy guwandyryjy ýagdaýdyr. Şolaryň hatarynda Türkmenistanyň Inžener-tehniki we ulag kommunikasiýalary instituty hem bar.

Geçen ýyl ýaş nesliň wekilleri bilimde, ylymda, sportda, medeniýetde, senagatda, oba hojalygynda we ykdysadyýetiň beýleki pudaklarynda uly üstünlikleri gazandylar, diňe bir ýurdumyzda däl, eýsem, halkara derejeli ýaryşlarda, olimpiadalarda-da ýeňiş gazanyp, Watanymyzyň Döwlet baýdagyny belende galdyrdylar.

Bu halkara ylmy-amaly maslahat Berkarar döwletiň täze eýýamynyň Galkynyşy döwründe eziz Watanymyzda gazanylan üstünlikleri, belent sepgitleri, jemgyýet abadançylygyny, ýaşlaryň bagtyýar durmuşyny has-da şöhratlandyrmak, giň möçberli maksatnamalaryň, iri taslamalaryň taryhy ähmiýetini giňden wagyz etmek maksatlaryna gönükdirildi. Bu forum ýaşlaryň sagdyn ösüp-örňemekleri, kämil ylym-bilim almagy, iş bilen üpjünçiligi, sagdyn durmuş ýörelgelerine eýerip, sport bilen meşgullanmagy, özbaşyna öý-ojak gurup, maşgala abadançylygyna eýe bolmagy babatdaky giň gerimli tagallalary öz içine alýan döwlet syýasatynyň dabaralanýandygynyň ýene bir görkezijisine öwrülip, täze taryhymyza şan getiren wakalaryň hataryna girer.

Ösüşlere beslenen 2023-nji ýylyň dowamynda ýurdumyzyň dürli künjeklerinde häzirki zaman kämil tehnologiýalarydyr döwrebap okuw enjamlary bilen üpjün edilen täze bilim ojaklarynyň açylmagy begendiriji ýagdaý bolup, ýaş nesil hakdaky aladalaryň dabaralanýandygyny äşgär etdi. Bu ugurda ýetilen sepgitler paýtagtymyzda üstünliklere beslenip geçen, Arkadag Serdarly bagtyýar ýaşlar ýylynyň özboluşly jemlenmesine öwrülen ýaşlaryň halkara ylmy-amaly maslahatynda we köpugurly sergide hem anyk beýanyny tapdy.

Bilim ulgamyny düýpli özgertmek, onuň işini dolandyrmagy kämilleşdirmek we ýaşlara berilýän bilim-terbiýäniň ýokary hilini üpjün etmek ugrundaky taýsyz tagallalary üçin hormatly Prezidentimize we Gahryman Arkadagymyza çäksiz alkyş aýdýarys!

Sahymerdan ÝAGŞYNAZAROW,
Türkmenistanyň Inžener-tehniki we ulag kommunikasiýalary institutynyň Ykdysadyýet we dolandyryş fakultetiniň Ykdysadyýet we dolandyryş hünäriniň 2-nji ýyl talyby.