Bagtyýarlyk döwrümizde ýaşlaryň durmuş taýdan goraglylygyny üpjün etmekde, olaryň milli ruhda terbiýelenmegini, giň dünýägaraýyşly adamlar bolup ýetişmegini gazanmakda zerur şertler döredilip, bimöçber işler durmuşa geçirilýär. Ol işler ösen tehnologiýalardan baş çykarýan ýaşlary ýüze çykarmakdan, ýaş nesilde watansöýüjiligi, ynsanperwerligi kemala getirmekden gözbaş alýar. Döwlet derejesinde edilýän şeýle aladalardan ruhlanýan ýaşlarymyz bu gün ykdysadyýetimiziň dürli pudaklarynda, durmuşyň ähli ulgamlarynda üstünlikli zähmet çekýärler. Olaryň halal zähmetleriniň oňyn netijeleri ýurdumyzda gazanylýan üstünliklerde mynasyp beýanyny tapýar. Muňa şu hepdäniň dowamynda Türkmenistanyň Inžener-tehniki we ulag kommunikasiýalary institutynda geçirilen birnäçe bäsleşikler, açyk sapaklar, sport we saglygy dikeldiş işleriň netijesinde has aýdyň göz ýetirmek bolýar.

Bilşimiz ýaly, şu ýylyň 10-njy fewralynda geçirilen Ministrler Kabinetiniň giňişleýin mejlisinde: «Ýene-de birnäçe wagtdan ýaş nesilleriň gerdenine geljekde ýurdumyzy dolandyrmak wezipesi düşer. Munuň üçin olardan maksatlara ýetmekde hakyky watançylyk, ýokary hilli bilim almak we yhlasly zähmet çekmek talap edilýär» diýip, Arkadagly Serdarymyzyň aýratyn nygtap geçmegi ýaşlaryň ählitaraplaýyn kämil ösüşi üçin alnyp barylýan aýgytly işleriň jogapkärçiligini has-da artdyrdy. Hakykatdan-da, bu günki günde ýurdumyzyň ýaşlary jemgyýetçilik we syýasy durmuşa işjeň gatnaşýarlar, jemgyýetiň bir bölegi hökmünde döwletiň durmuşynda möhüm orny eýeleýärler.

Türkmenistanyň Inžener-tehniki we ulag kommunikasiýalaryinstitutynda talyplara gurluşygyň tehnikasy we tehnologiýalary, binagärlik, elektro we ýylylyk energetikasy, tehnosfera howpsuzlygy we tebigy abadanlaşdyryş, ýerüsti ulagyň tehnikasy we tehnologiýalary, aeronawigasiýa we awiasion hem-de raketa-kosmiki tehnikalaryny ulanmak, gämi gurluşygynyň we suw ulagynyň tehnikasy we tehnologiýalary ugurlary boýunça bilim berilýär. Bu ulag we kommunikasiýa ojagymyzda ýaş inžener-tehnolog talyplara bilim berýän mugallymlar yhlas bilen zähmet çekip, talyplaryň geljekde öz hünäriniň hakyky eýeleri bolmagy üçin aladalar edýärler.

Türkmenistanda ýaşlar syýasatynyň ata-babalaryň asylly ýörelgeleri hem-de häzirki zaman jemgyýetçilik talaplaryna laýyklykda mynasyp durmuşa geçirilmegi ýaşlaryň ähli babatda döwlet durmuşynda uly ornunyň bolmagynda aýratyn many-mazmuna eýedir. Bu babatda Hormatly Prezidentimiz Serdar Berdimuhamedowyň belleýşi ýaly, türkmen ýaşlarynyň giň gözýetimli, ösen tehnologiýalardan baş çykarýan hünärmenleriň neslini kemala getirmegi alnyp barylýan işleriň esasy maksady bolup durýar. Şu nukdaýnazardan ýurduň milli ykdysadyýetiniň ähli ulgamlarynda, şol sanda ýangyç-energetika, ulag we kommunikasiýa, oba hojalygy, maliýe-bank ulgamynda we beýleki pudaklaýyn ugurlarda zehinli, başarnykly ýaşlaryň zähmet çekmeginiň ileri tutulýan işleriň hatarynda durýandygyny bellemek bolar.

Eziz Diýarymyzda ýaşlar hakyndaky aladanyň döwlet syýasatynyň möhüm ugruna öwrülmegi türkmen ýaşlarynyň mümkinçiliklerine berilýän ýokary bahanyň nyşanydyr. Türkmen halkynyň Milli Lideri tarapyndan binýady goýlup, hormatly Prezidentimiziň taýsyz tagallalarynyň netijesinde täze öwüşgine eýe bolýan ýaşlar syýasaty röwşen ertirimiziň eýeleri bolan ýaş nesil üçin döredilýän giň şert-mümkinçilikleri, täze gözýetimleri, kämilligiň möhüm basgançaklaryny açýar. Ýaşlar bolsa özleri hakyndaky şeýle uly aladany duýup, beýik ynama mynasyp bolmaga, ýurdumyzyň dürli pudaklarynda zähmet çekip, Watanymyzyň ösüşine mynasyp goşantlaryny goşmaga çalyşýarlar.

Uly üstünlikler hem-de taryhy ýeňişler bilen taryha giren Arkadag Serdarly bagtyýar ýaşlar ýylynyň netijeleri hem Watanymyzda ýaşlara bildirilýän belent ynamyň nyşanyna öwrüldi. Bu hakykat hormatly Prezidentimiziň türkmen ýaşlaryna sowgat eden ajaýyp eserinde — «Ýaşlar – Watanyň daýanjy» atly kitabynda hem giňden beýan edilýär. Täze kitap döwlet Baştutanymyzyň halkymyza, aýratyn-da, ýaşlarymyza ajaýyp döredijilik sowgady boldy. Gymmatly eserde ýurdumyzda durmuşa geçirilýän ýaşlar baradaky döwlet syýasatynyň esaslary barada aýratyn gürrüň edilýär. Bilşimiz ýaly, Diýarymyzda ýaşlaryň ähli ugurlarda zehinini, döredijiligini, ukyp-başarnygyny açyp görkezmegi, ýurdumyzyň jemgyýetçilik durmuşyna işjeň gatnaşmagy, ýaş nesliň aň-bilim, ruhy-ahlak we medeni ösüşi üçin döwrebap şertler döredilýär hem-de olaryň bähbitlerini, hukuklaryny, azatlyklaryny goramakda uly işler durmuşa geçirilýär. «Ýaşlar barada döwlet syýasaty hakynda» Türkmenistanyň Kanunynyň kabul edilmegi bu ugurdaky döwlet syýasatynyň hukuk binýadyny üpjün etdi. Eserde Watan mukaddesligi, ezizligi, beýik ösüşler, bagtly geljek, türkmen zenanlaryna goýulýan hormat, milli mirasymyz baradaky gymmatly pikirler hem giňden şöhlelenýär. Kitapda beýan edilýän pikir-garaýyşlar beýik işlere çakylyk bolup ýaňlanýar hem-de ýeňişlere, üstünliklere beslenen ýollary salgy berýär.

Garaşsyz döwletimizi ösüşleriň täze belentliklerine alyp gitmek üçin ägirt uly tagallalary durmuşa geçirýän Arkadagly Gahryman Serdarymyzyň janynyň sag, ömrüniň uzak, il-ýurt ähmiýetli işleriniň hemişe rowaç bolmagyny arzuw edýäris.

 Arslan ÇARYÝEW,
Türkmenistanyň Inžener-tehniki we ulag kommunikasiýalary institutynyň Ulaglar fakultetiniň 2-nji ýyl talyby.