Berkarar döwletiň täze eýýamynyň Galkynyşy döwründe hormatly Prezidentimiz ýaşlaryň beden taýdan sagdyn ösmegine, döwrebap bilim-terbiýe almagyna aýratyn üns berýär. Bu günki ýurdumyzda gurlup, ulanylmaga berilýän umumybilim berýän orta mekdepleriň, ýokary we orta hünär okuw mekdepleriň döwrebap binalary, olarda ornaşdyrylýan häzirki zaman okuw enjamlary, şol sanda kämil kompýuterler, multimedia-interaktiw enjamlary, görkezme esbaplary buýsanç bilen agzalmaga mynasypdyr.

Halkara parahatçylyk we ynanyşmak ýylynda talyp ýaşlar döwrebap bilim ojaklarynda okamak bilen, özleri üçin döredilýän giň şertlerdir mümkinçiliklerden netijeli peýdalanýarlar, bilimiň esaslaryny çuňňur öwrenýärler, hünärleri höwes bilen ele alýarlar. Arkadagly Gahryman Serdarymyzyň taýsyz tagallalary netijesinde «Ýaşlar barada döwlet syýasaty hakynda» Türkmenistanyň Kanunynyň, «Türkmenistanda ýaşlar baradaky döwlet syýasatynyň 2021 — 2025-nji ýyllar üçin Döwlet maksatnamasynyň» hem-de şol maksatnamany amala aşyrmak boýunça ýerine ýetirilmeli çäreleriň Meýilnamasynyň kabul edilmegi ýurdumyzda ýaşlar syýasatynyň rowaçlanýandygynyň alamatydyr. Şonuň bilen baglanyşykly, berkarar Watanymyzda ýaşlar syýasaty milli kanunçylyk namalary, halkara ýörelgeleri esasynda üstünlikli durmuşa geçirilýär.

Ýaşlaryň hukuk we durmuş taýdan goraglylygyny üpjün etmek, olaryň arasynda ruhy-ahlak we medeni gymmatlyklarymyzy, milli däpdessurlarymyzy wagyz etmek, sagdyn durmuş ýörelgelerini has-da rowaçlandyrmak, watansöýüjiligi, raýat jogapkärçiligini, zähmete söýgini terbiýelemek, ýaşlaryň jemgyýetçilik şahsy başlangyçlaryny ileri tutmak, goldamak we höweslendirmek boýunça döwlet Baştutanymyz tarapyndan öňde goýlan esasy wezipelerdir. Şol wezipeleriň hatarynda ýaşlar toparlarynyň isleglerini öwrenmek, hasaba almak we olary kanagatlandyrmak ýaly möhüm ugurlary hem agzamak ýakymlydyr. Häzirki wagtda agzalan ugurlarda durmuşa geçirilýän toplumlaýyn işler bagtyýar ýaşlara özlerini has-da bagtyýar duýmaga, hünär kämilligine ýetmäge, ähli taraplaýyn sazlaşykly ösüp, kämil şahsyýetler bolup ýetişmäge hyjuw döredýär.

Hormatly Prezidentimiziň nygtaýşy ýaly, döwlet ýaşlar syýasaty Türkmenistanyň ýaş raýatlarynyň hukuklaryny we azatlyklaryny amala aşyrmaga gönükdirilen durmuş, ykdysady, syýasy, guramaçylyk hem-de hukuk çäreleriniň ulgamynyň döredilmegini göz öňünde tutýar. Şonuň üçin bu işe jemgyýetçilik guramalary hem-de degişli döwlet edaralary işjeň goşulmalydyr.

Özleri hakynda edilýän aladalara mynasyp jogap bermek bilen, bu gün ýaşlarymyz döwlet, häkimiýet we dolandyryş edaralarynda, halk hojalygynyň dürli pudaklarynda, hususy ulgamda yhlasly zähmet çekýärler, durmuş ugurly döwlet maksatnamalarynyň amala aşyrylyşyna işjeň gatnaşýarlar. Bu bolsa ýaşlaryň islendik döwletiň ykdysady ösüşinde hem aýratyn orun tutýandygyny görkezýär. Bagtyýar ýaşlar bolsa bilimlerini kämilleşdirip, bildirilýän belent ynamy ödemek ugrunda gujur-gaýratlaryny gaýgyrmajakdygyna tüýs ýürekden ynanýarys.

Berkarar döwletiň täze eýýamynyň Galkynyşy döwründe Gahryman Prezidentimiziň ýaşlar üçin döredýän ähli taraplaýyn şertleridir mümkinçilikleri biziň watançylyk ruhumyzy has-da belende göterýär. Munuň üçin halkymyzy beýik işlere, päk zähmete ruhlandyryjy Gahryman Arkadagymyza hem-de Arkadagly Gahryman Serdarymyza alkyşlarymyzyň çägi ýokdur.

Goý, halkyny bagtly geljege alyp barýan türkmen halkynyň Milli Lideriniň hem-de Arkadagly Gahryman Serdarymyzyň janlary sag, ömürleri uzak bolsun! Halk üçin, Watan üçin, eşretli döwür üçin yhlas siňdirip, durmuşa geçirýän tutumly işleri mundan beýläk hem rowaç alsyn!

Azat MUHIÝEW,
Türkmenistanyň Magtymguly adyndaky Ýaşlar guramasynyň Mary welaýatynyň Baýramaly etrap Geňeşiniň guramaçylyk bölüminiň müdiri.