Berkarar döwletiň täze eýýamynyň Galkynyşy döwründe Arkadagly Serdarymyzyň parasatly ýolbaşçylygynda alnyp barylýan we barha ösüşlere beslenýän döwlet syýasatynyň ileri tutulýan ugurlarynyň biri hem, elbetde, ýaşlar baradadyr. Bu ugurda ýurdumyzyň kanunçylyk-hukuk binýady hem pugtalandyrylyp, «Ýaşlar barada döwlet syýasaty hakynda» Türkmenistanyň Kanuny röwşen geljegimiziň eýeleri bolan ýaş nesilleriň abadan, asuda durmuşda ýaşamagyna, okamagyna, zähmet çekmegine gönükdirilendir.

Döwlet Baştutanymyz ýurdumyzyň geljeginiň ýaşlara baglydygyny hemişe nygtap, ýaşlaryň hukuk we durmuş taýdan goraglylygyny üpjün etmek, olaryň arasynda sagdyn durmuş ýörelgesini has-da rowaçlandyrmak, sporty, ruhy ahlak we medeni gymmatlyklarymyzy, milli däp-dessurlarymyzy wagyz etmek, watansöýüjiligi, zähmete bolan söýgini terbiýelemek, olaryň jemgyýetçilik, şahsy başlangyçlaryny ileri tutmak, goldamak we höweslendirmek ýaly möhüm wezipeleri öňe sürýär.

Hormatly Prezidentimiz: “Biz Berkarar döwletiň täze eýýamynyň Galkynyşy döwründe öňümizde belent maksatlary goýduk. Mähriban Watanymyzyň abadançylygyny we durmuş-ykdysady ösüşini, halkymyzyň ýaşaýyş derejesini mundan beýläk-de ýokarlandyrmak, dünýäde parahatçylygy hem-de ynanyşmagy berkitmek wezipelerini öňe sürdük. Şu belent maksatlara ýetmekde ýurdumyzyň ýaş nesillerine aýratyn bil baglaýarys” diýip, uly buýsanç bilen belleýär. Arkadagly Serdarymyzyň özlerine bildirýän şeýle belent ynamyny ödemek Berkarar döwletiň täze eýýamynyň Galkynyşy döwrüniň belent ruhly ýaşlarynyň baş maksady bolup durýar.

“Arkadag Serdarly bagtyýar ýaşlar" ýyly ýaşlara bildirilýän uly ynamyň döwrüdir. Ýurdumyzda giň gözýetimli nesilleri terbiýeläp ýetişdirmekde, öňdebaryjy dünýä tejribesine daýanýan häzirki zaman bilimlerini ele almakda, ylym we döredijilik bilen meşgullanmakda ýaş nesilleri paýhasly pederlerimiziň asylly däp-dessurlary esasynda terbiýelemekde hem-de ata Watanymyza mynasyp ýaşlary kemala getirmekde mugallymlaryň üstüne uly borç düşýär. Bilşimiz ýaly, ata-babalarymyz ýaşlaryň dünýägaraýşyna tymsallaryň we rowaýatlaryň, çeper eserleriň üsti bilen uly täsir edipdirler. Häzirki wagtda bu ýörelgeler ýaş nesli terbiýelemekde işjeň ulanylýar.

Her bir işde ýaşlara hut özüniň nusgalyk görelde mekdebi bolup durýan, her bir ýaşraýatyň bagtyýar çagalygy, parlak geljegi, hözirli durmuşy, söýgüli kesp-käri barada irginsiz alada edýän hormatly Prezidentimiziň taýsyz tagallalarynyň netijesinde, «Ýaşlar barada döwlet syýasaty hakynda» Türkmenistanyň Kanunynyň kabul edilmegi, Ministrler Kabinetiniň ýanynda ýaşlaryň meseleleri bilen gyzyklanýan bölümiň açylmagy ýaşlar baradaky syýasatyň Türkmenistanyň Prezidentiniň döwlet syýasatynyň aýrylmaz düzüm bölegi bolup durýandygynyň aýdyň nyşanydyr.

Arkadag Serdarly bagtyýar ýaşlaryna, mähriban halkymyza şeýle ajaýyp zamanada ýaşamaga ähli mümkinçilikleri döredip berýän türkmen halkynyň Milli Lideriniň hem-de Arkadag Prezidentimiziň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Han NARMÄMMEDOW, 
Türkmenistanyň Inžener-tehniki we ulag kommunikasiýalary institutynyň Mehanika-tehnologik fakultetiniň 4-nji ýyl talyby.