Her bir güni şanly senelere, guwandyryjy üstünliklere beslenýän hemişelik berkarar ýurdumyzda okgunly ösýän ykdysadyýetimizi sanlylaşdyrmak boýunça giň gerimli işler alnyp barylýar. Bu wezipeler maglumat tehnologiýasynyň iň häzirki zaman görnüşleriniň ornaşdyrylýandygy bilen aýratyn tapawutlanýar. Milli ykdysadyýetimizi sanly ulgama geçirmek boýunça ähli pudaklaryň öňünde belent maksatlaryň goýulmagy bu babatdaky giň gerimli işleriň ilerlemegine aýratyn goşant goşýar.

Arkadagly Gahryman Serdarymyzyň ýolbaşçylygynda sanly ulgamy ösdürmegiň konsepsiýasynyň çäklerinde ýurdumyzda maglumat-kommunikasiýa tehnologiýasyny işjeňleşdirmek maksady bilen, döwlet edara-kärhanalarynda degişli meýilnamalar taýýarlanylyp, tehniki şertler we kadalaşdyryş-hukuk düzgünnamalary bilen üpjün etmek boýunça işler alnyp barylýar.

Hormatly Prezidentimiziň Karary bilen tassyklanan “Türkmenistanda 2019 - 2025-nji ýyllarda sanly ykdysadyýeti ösdürmegiň Konsepsiýasyna” laýyklykda birnäçe resminalamalar kabul edildi. Olardan «Türkmenistanda internet torunyň ösüşini we internet — hyzmatlaryny etmegi hukuk taýdan düzgünleşdirmek hakynda», «Maglumat we ony goramak hakynda», «Şahsy durmuş barada maglumat we ony goramak hakynda», «Kiberhowpsuzlyk hakynda», «Elektron resminama, elektron resminama dolanyşygy we sanly hyzmatlar hakynda» we başga-de birnaçe Kanunlara gol çekildi. Ýurdumyzyň ösüşini täze hil derejä çykarmaga itergi beren bu Konsepsiýanyň durmuşa geçirilmegi bilen ykdysadyýete maýa goýum işjeňliginiň, ýokary tehnologiýalaryň ornaşdyrylmagynyň, täze iş orunlarynyň döredilmeginiň ösüşini üpjün eder.

Häzirki döwürde sanlylaşdyrmagy ilerletmek we intellektual ulgamlaryň işini pugtalandyrmak ýurdumyzyň kommunikasiýa pudagynyň paýyna düşýär. Mälim bolşy ýaly, hormatly Prezidentimiziň kabul eden «Türkmenistanda sanly ykdysadyýeti ösdürmek boýunça Pudagara topary döretmek hakynda» Kararyna laýyklykda ýurdumyzda sanly ykdysadyýeti ösdürmek boýunça ygtyýarly edara kesgitlendi.

Bu ugurda netijeli işler alnyp barylýar. Muňa mysal hökmünde hökümet agzalarynyň, häkimlikleriň, ministrlikleriň, pudaklaýyn dolandyryş edaralarynyň hem-de daşary ýurtly pudaklaýyn wekiliýetleriň arasynda sanly wideoaragatnaşyk arkaly iş maslahatlary geçirmäge mümkinçilik berýän ulgam doly ornaşdyryldy.

Ýurdumyzda transmilli optiki-süýümli aragatnaşyk ulgamynyň bolmagy internet akymlarynyň üstaşyr geçirijilik ukybyny ýokarlandyrmaga mümkinçilik berýär. Ilatyň sanly maglumatlara dörän ýokary isleglerini kanagatlandyrmak maksady bilen, ýurdumyzda häzirki wagtda internet akymynyň tizligi barha artdyrylýar.

Mundan başga-da, raýatlar üçin amatlyklary döretmek we elektron hyzmatlar ulgamyny kämilleşdirmek maksady bilen, e.gov.tm döwlet portaly işläp başlady. Bu elektron saýtda ilat üçin «bir penjire» döwlet hyzmatlaryny ýerine ýetirmegiň awtomatlaşdyrylan maglumat ulgamy döredildi. Häzirki döwürde ornaşdyrylan öýjükli we simli telefon, IP-TV, internet ýaly aragatnaşyk hyzmatlary, awtomobil, demir ýol we howa ulaglary, jemagat, bank hyzmatlary boýunça onlaýn arkaly tölegler halkymyzyň arasynda uly islegden peýdalanýar.

Bularyň ählisi «Pähim-paýhas ummany Magtymguly Pyragy» ýylynda ýurdumyzda sanly ykdysadyýete geçmek ugrundaky işleriň ýokary depginlerde we üstünlikli alnyp barylýandygynyň anyk mysallarydyr. Belent arzuwlaryň, ýagşy niýetleriň, rowaçlyklaryň ýurdy bolan mähriban Watanymyzyň ajaýyp geljeginiň mizemez binýatlaryny döretmekde tagalla edýän türkmen halkynyň Milli Lideriniň hem-de Arkadagly Gahryman Prezidentimiziň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Merjen ESENOWA,
Beki Seýtäkow adyndaky Mugallymçylyk mekdebiniň 1-nji ýyl talyby.