Hormatly Prezidentimiziň söýgüsinden, yhlasyndan, döredijilikli zehininden, binagärlik ukybyndan täze keşbe eýe bolýan Aşgabat dünýäniň nusgalyk şäherine öwrülýär. Binalary ak mermere, goýny goýry baglara, çarbaglary gül-çemene bürenen paýtagtymyzyň keşbinde päklik, goýnunda bagtyýarlyk orun tutup, gujagynda yşk, ýaşlyk, gujur-gaýratlylyk hem gözellik joş urýar. Bu gün türkmen halky Aşgabadyň nuranalyga, gözellige ýugrulan keşbinden ylham alýar.

Paýtagtyna bakyp, döwlete we onuň halkyna baha berilýär. Aşgabat — diňe gözelligi bilen ady äleme ýaýran şäher bolman, eýsem, özünde egsilmez ylhamy, çeper keşbi jemleýän täsin bir sazlaşyk, simfoniýa. Behişdi erem kimin owadan seýilgählerdäki asmana atygsaýan suw çüwdürimleri täsin tansy bilen ynsana rahatlyk, şähere bolsa gözellik eçilýär. Bu görnüşler sazlaşykly bitewülige öwrülip, deňsiz-taýsyz sungat eserini emele getirýär. Gijelerimizi bezeýän dürli öwüşginli yşyklar kalbymyza yşk paýlaýar. Baglarda saýraýan guşlaryň hoş owazlary, erkana ganat ýaýýan garlawaçlar, aýna ýaly ýollaryň ýakalarynyň, aýmançalarynyň çemenzarlygy kalplara mähir paýlaýar.

«Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasyna» laýyklykda, Aşgabat şäheriniň binagärlik keşbini mundan beýläk-de özgertmek, ýaşaýyş-durmuş amatlyklaryny, paýtagtyň jemagat hojalygyny ösdürmek boýunça işler üstünlikli durmuşa geçirilýär. Paýtagtyň giň möçberli mümkinçilikleriniň bardygyny nazara almak bilen, ýokary okuw mekdepleriniň edara binalarynyň, ýaşaýyş jaý we seýilgäh toplumlarynyň, söwda merkezleriniň we bazarlaryň, häzirki zaman ulag ýollarynyň we beýleki durmuş maksatly desgalaryň gurulmagy döwletiň ýokary gymmatlygy hökmünde adam hakyndaky aladanyň döwlet syýasatynyň baş ugrudygynyň tassyknamasy bolup durýar.

Ak şäherimiz Aşgabady ösdürmegiň ileri tutulýan ugurlarynyň hatarynda senagat, ýaşaýyş jaý we jemagat hojalygyny, ulag-kommunikasiýa ulgamyny, harytlaryň we hyzmatlaryň sarp ediş bazaryny, döwlete dahylsyz bölegiň kiçi we orta möçberli kärhanalaryny, durmuş ulgamyny we ýaşaýyş derejesini görkezmek bolar. Şu jähetden, Aşgabat şäheriniň dünýä derejesinde döwrebap ýaşaýyş-durmuş şertlerini özünde jemleýän merkezleriň biridigi aýratyn bellenmäge mynasypdyr. 2013-nji ýylyň 25-nji maýynda Aşgabadyň dünýäde ak mermerli binalaryň iň köpüsiniň bir ýere jemlenen şäheri hökmünde Ginnesiň Bütindünýä rekordlar kitabyna girizilendigini aýratyn bellemek gerek. Mundan başga-da, paýtagtymyzyň nurana desgalarynyň ençemesi şeýle ykrarnama eýe boldy.

Häzirki wagtda Aşgabatda gurlup ulanylmaga berilýän desgalaryň sanynyň yzygiderli artmagynda halkymyzyň ýaşaýyş-durmuş derejesiniň barha ýokarlanýandygy bilen bir hatarda, ygtybarlylygyň, howpsuzlygyň we bezeg aýratynlygy bilen tapawutlanýan ýokary amatlykly innowasion gurluşyk senagatyny görmek bolýar. Paýtagtymyzyň keşbinde ýurdumyzyň durmuş-ykdysady derejesi, intellektual kuwwaty, türkmen halkynyň baý taryhy we medeni däp-dessurlary öz beýanyny tapýar. Şäheriň taryhy merkezlerine aýawly çemeleşmek boýunça toplumlaýyn çäreler durmuşa geçirilýär. Paýtagtyň has irki döwürleriniň şaýady bolan binalardyr ýadygärlikler halkymyz üçin bahasyz gymmatlyklardyr, taryhymyzyň parçalarydyr.

Gahryman Arkadagymyzyň «Ak şäherim Aşgabat» atly kitabynda belleýşi ýaly, Aşgabat bu gün eşretli durmuşyň berkarar edilen belent derejesini, gurmagyň we döretmegiň kämil gurşawyny, onuň çuň many-mazmunyny äşgär edip, ösüşleriň täze belentliklerine çykýar.

Döwlet Baştutany hökmünde ählihalk tarapyndan saýlanan gününden başlap, hormatly Prezidentimiz ýurdumyzy düýpgöter özgertmek, döwrebaplaşdyrmak we oňyn özgertmeleri amala aşyrmak baradaky strategiýany öňe sürdi, şol özgertmeler tutuş türkmen topragyny gurşap almak bilen, olar Aşgabadyň täze keşbinde hem öz beýanyny tapýar.

Halkara parahatçylyk we ynanyşmak ýylynda Berkarar döwletimizi hemmetaraplaýyn ösdürmek ugrunda amala aşyrylýan işleriň ählisi bolsa, Gahryman Arkadagymyzyň we Arkadagly Gahryman Serdarymyzyň halkymyzyň ýaşaýyş-durmuş şertlerini has-da gowulandyrmak baradaky taýsyz tagallalarynyň netijesidir. Goý, halkyny bagtly geljege alyp barýan türkmen halkynyň Milli Lideriniň hem-de Arkadagly Gahryman Prezidentimiziň janlary sag, ömürleri uzak bolsun! Halk üçin, Watan üçin, eşretli döwür üçin yhlas siňdirip, durmuşa geçirýän tutumly işleri mundan beýläk hem rowaç alsyn!

Alma ANNABAÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Lukmançylyk gullugynyň guralyşy we usulyýeti kafedrasynyň mugallymy.