Berkarar döwletiň täze eýýamynyň Galkynyşy döwründe Arkadagly Serdarymyzyň başlangyçlary esasynda ýaşlaryň durmuş üpjünçiligini kepillendirýän milli kanunçylyk ulgamy döredildi. «Ýaşlar barada döwlet syýasaty hakynda» Türkmenistanyň Kanuny kabul edilip, ýurdumyzda ýaşlary döwlet tarapyndan goldamak babatynda utgaşykly işler ýola goýuldy. Şunuň bilen baglylykda, häzir ýaşlar döwlet, häkimiýet, dolandyryş edaralarynda, ykdysadyýetimiziň ähli pudaklarynda milli hem-de döwlet maksatnamalarymyzyň üstünlikli durmuşa geçirilmegi ugrunda netijeli zähmet çekýärler.

Hormatly Prezidentimiziň degişli Karary bilen «Türkmenistanda ýaşlar baradaky döwlet syýasatynyň 2021–2025-nji ýyllar üçin Döwlet maksatnamasynyň hem-de ony amala aşyrmak üçin ýerine ýetirilmeli çäreleriň meýilnamasynyň» kabul edilmegi ýurdumyzyň ýaş raýatlarynyň syýasy hukuklaryny we azatlyklaryny, döwletiň we jemgyýetiň ykdysady, syýasy hem-de medeni durmuşyna işjeň gatnaşmaklaryny üpjün etmäge, şeýle hem olarda belent ruhy-ahlak ýörelgeleriň emele gelmegine, ösüp gelýän nesli watançylyk, ynsanperwerlik hem-de zähmetsöýerlik ruhunda terbiýelemäge uly itergi berdi.

Ýaşlara ýol-ugur görkezmekde mugallymlaryň paýyna uly jogapkärçilik düşýär. Her bir mugallym şol jogapkärçiligi duýup, talyplaryň kabul edişine görä bilim bermeli bolýar. Diňläp oturan talyp üçin mugallymyň aýdýan her bir sözi gymmatlydyr. Şol nukdaýnazardan seredenimizde hem ýaşlaryň aň taýdan kämil, hünär taýdan başarnykly bolmagy üçin mugallymlaryň täsiri uludyr.

Islendik hünär boýunça bilim alýan ýaşlar öwrenýän bilimlerini tejribelikde ulanyp görmek üçin hem ukyply bolmalydyr. Ýaşlar ýokary we hünär okuw mekdeplerinde diňe belli bir ugra gönükdirilen sowadyny artdyrmagy göz öňünde tutman, mugallymlaryň we tälimçileriň durmuş hem-de iş tejribeliklerini hem öwrenmelidirler.

Häzirki wagtda ýurdumyzda ýaşlaryň okamagy, işlemegi üçin döwletimiz tarapyndan giň mümkinçilikler döredilýär. Türkmen ýaşlarynyň tehnologiýanyň iň soňky gazananlaryndan, sanly ulgamdan oňat baş alyp çykmaklary döwrüň talabydyr. Gahryman Arkadagymyz, Arkadagly Serdarymyz ýaşlara bil baglaýar, uly ynam bildirýär, çünki kalby ata Watanymyza söýgüden doly ýaşlar geljekde kämil hünärmenler bolup ýetişmelidir. Ajaýyp döwrümizde ýaşlar şeýle bagty duýup ýaşaýarlar. Bu günki gün bagtyýar ýaşlarymyz öz öňlerinde belent maksat goýup, ynamly öňe barýarlar. 

Döwletimiziň ähli ulgamlarynda gazanylýan üstünlikler bagtly geljegimiziň eýeleri bolan ýaşlar bilen berk baglanyşyklydyr. Şonuň üçin hem, Garaşsyz Watanymyzda ýaş neslimiziň bagtyýar durmuşy we gelejegi barada çuňňur aladalanýan Gahryman Arkadagymyza we Arkadagly Serdarymyza tüýs ýürekden sag bolsun aýdýarys. Türkmen halkynyň Milli Lideriniň hem-de Arkadag Prezidentimiziň janlary sag, ömürleri uzak bolsun, il-ýurt bähbitli beýik işleri mundan beýläk-de rowaçlyklara beslensin!

Guwanç SAPAROW,
Türkmenistanyň inžener-tehniki we ulag kommunikasiýalary institutynyň Ulaglar fakultetiniň Howa hereketiniň dolandyrylyşy hünäriniň talyby.