Hormatly Prezidentimiziň parasatly baştutanlygynda Berkarar döwletiň täze eýýamynyň Galkynyşy döwründe Diýarymyzyň her bir güni toýdur baýramlara beslenýär. Gazanylýan üstünlikler, ýetilýän sepgitler ata Watanymyzyň dünýä ýüzündäki mertebesini has-da artdyrýar. Döwleti dolandyrmagyň häzirki zaman kadalary hem ata-babalarymyzyň kämil tejribeleri esasynda kemala gelen gadymy ýol-ýörelgelere esaslanýar. 

Türkmenistanyň Esasy Kanunynyň — Konstitusiýasynyň hukuk namalarynyň, şeýle hem gol çekilen halkara şertnamalaryň kadalarynyň berjaý edilmegi ýurdumyzda raýat hukugyny goramagyň dünýäniň talaplaryna laýyk derejede guralýandygyndan habar berýär. 

Ýurdumyzyň Konstitusiýasy her bir raýatyň hukuklaryny we azatlyklaryny üpjün edýär hem-de döwletimiziň umumadamzat gymmatlyklaryna ýokary baha berýändigini beýan edýär. Esasy Kanunymyz jemgyýetde asudalygy, agzybirligi berkarar etmek bilen bir hatarda, demokratik, hukuk, dünýewi döwletiň esaslaryny düzýär.

Ýurduň syýasy, ykdysady, durmuş we medeni taýdan durnukly ösüşini üpjün etmekde adam hukuklaryna esasy orun degişlidir. Taryhy tejribäniň görkezişi ýaly, ösüşiň we azatlygyň ýoly bilen jemgyýetiň öňe gitmegi adam hukuklarynyň giňelmeginden we olaryň mazmunynyň baýlaşmagyndan üzňe däldir. Jemgyýetiň ösüşiniň her täze basgançagy adam hukuklarynyň berjaý edilmegi hem-de giňelmegi bilen bagly bolup durýar. Adam hukuklary we azatlyklary — bu döwletliligiň hiline, onuň demokratiýalylyk derejesine baha bermegiň, hukuk başlangyçlaryna, ahlaklylygyna, umumadamzat gymmatlyklaryna ygrarlylygynyň baş çelgisidir. 

Esasy Kanunymyz döwletimizde adamyň we raýatyň hukuklarynyň we azatlyklarynyň deňligini, şeýle hem milletine, teniniň reňkine, jynsyna, gelip çykyşyna, emläk hem wezipe ýagdaýyna, ýaşaýan ýerine, diline, dine garaýşyna, syýasy ynam-ygtykadyna ýa-da gaýry ýagdaýlara garamazdan, adamyň we raýatyň kanunyň öňündäki deňligini üpjün edýär. 

Berkarar döwletiň täze eýýamynyň Galkynyşy döwründe milli kanunçylygymyzyň döwrebaplygynyň, kämilliginiň nyşany bolan Konstitusiýamyzyň esasy maksady raýatlaryň konstitusion hukuklaryny we azatlyklaryny doly üpjün etmekden ybarat bolup durýar. Hormatly Arkadagly Serdarymyzyň adalatly döwlet syýasaty adam mertebesiniň ýokarlanmagyna, ilatyň ýaşaýyş-durmuş ýagdaýynyň ýokary derejede saklanylmagyna, erkin we adalatly jemgyýetiň gurulmagyna gönükdirilendir.

Mansur KAMALOW,
Türkmenistanyň Inžener-tehniki we ulag kommunikasiýalary institutynyň Jemagat infrastrukturasy we inženerçilik ulgamlary fakultetiniň 4-nji ýyl talyby.