Türkmen nusgawy edebiýatynyň beýik akyldary, sarsmaz sütüni, milli şahyrymyz Magtymguly Pyragynyň çuňňur manyly, agzybirlige mertlige dogruçyllyga, il-gününe, Watanyna wepaly bolmaga çagyrýan ajaýyp şygyrlary asyrlar geçse-de öz gymmatyny ýitirmeýär, gaýtam ol has-da belende galýar. Geçen ýyl ýurdumyzda akyldar şahyrymyz, dana atamyz Magtymguly Pyragynyň doglan gününiň 300 ýyllygynyň dabaraly bellenilip geçilmegi milli şahyrymyzyň halkara derejesinde ykrar edilen edebi mirasyna goýulýan uly sarpadan nyşandyr.

Magtymguly Pyragy adamzat kalbynyň şahyrydyr. Ol biziň kalbymyzdaky pikirimizi bilen ýaly hakykaty ýazypdyr. Akyldar şahyryň parastly sözleri biziň ýüregimiziň törinden orun alyp ýaşaýar. Magtymguly Pyragynyň şygyrlary hakynda rus alymy Ýewgeniý Eduardowiç Bertelsiň sözleri bilen aýtsak “Magtymguly türkmeniň poeziýasynyň gymmatbaha daşlarynyň biri bolup, ol biziň zamanymyzda täze ýüzügiň gaşynda göziňi gamaşdyryjy şöhlesi bilen lowurdaýar”. Magtymguly Pyragynyň çuňňur mana ýugrulan şygyrlary ölmez-ýitmezdir. Magtymguly ähli döwürleriň, ähli ynsanlaryň şahyrydyr. Çünki şahyryň döredijiligi durmuşyň ähli ugurlary barada söz açýar. Halkymyzyň arasynda “Magtymgulynyň aýtmadyk zady ýok” diýilmegi hem muňa şaýatlyk edýär.

Türkmen halky akyldar şahyrymyza uly hormat goýýar. Muny Türkmenistanyň halk ýazyjysy Nurmyrat Saryhanowyň “Kitap” hekaýasyndaky Welmyrat aganyň obrazynda hem göz ýetirmek bolýar. Ol Magtymgulynyň goşgylaryny diňläp, gijesi bilen ol goşgular barada oýlanyp, oňa nähili täsir edendigini şeýle beýan edýär: “Kitap, onuň içindäki sözleriň meniň ýüregimiň üstünden turşy meni haýran etdi” Bu nähili bolup bilýär? Ol ýüzüňe seredýär-de hemme zatlary, öz durmuşyndan, gündelik eşidip ýören zatlaryňdan, ýöne welin dilde diýip bolmajak, aýtmagy hyýalyňda getirmedik zatlaryňy diýişdirip bilýär”. Hekaýada guba düýe berip, akyldar şahyryň kitabyny satyn almagy hem bu gymmatly, dürdäne sözleriniň onuň ýüreginiň törinde orun alanlygy üçindir.

Akyldar şahyr öziniň dürdäne şygyrlary bilen ynsanlary dogry sözli bolmaga, birek-birege hormat goýup, adamkärçilikli adam bolup ýaşamaga çagyrýar. Şahyr ikiýüzli adamlary ýigrenipdir, päk ýürekli, süýji dilli, arassa ahlakly mylakatly bolmaklygy nesihat edipdir. Beýik akyldar birek-birege ýagşylyk etmeklerini ulyny sylamagy, kiçini söýmegi, il-halkyna, Watanyňa wepaly bolup ýaşamagy öwüt ündew edipdir. Biz hem ýokary okuw mekdebimizde “Pähim-paýhas ummany Magtymguly Pyragy” ýylynda şahyryň sarpasyny belent tutup, dürli çäreleri yzygiderli guraýarys. Olaryň hatarynda “Magtymguly Pyragy - akyldar şahyr”, “Magtymguly sözlär tili türkmeniň” diýen temalarda edebi agşamlary, döredijilik hem-de surat bäsleşiklerini aýtmak bolar. Bu geçiren çärelerimiz arkaly ata Watana, il-halkyna söýgi, edeplilik, özüňden ula hormat, kiçini sylamak, halallyk, ynsanperwerlik ýaly ynsanyň gowy gylyk-häsiýetlerini ýaşlara düşündirýäris, berkarar döwletimize guwanç we buýsanç duýgularyny terbiýeleýäris.

Halk öz şahyryna ähli döwürlerde hem aýratyn hormat goýupdyr. Onuň eserleri ençeme gezek neşir edildi, ençeme ylmy işler, monografiýalar ýazyldy. Akyldar şahyrymyzyň edebi mirasyny daşary ýurt alymlary-da öwrenýärler hem-de eserleri daşary ýurt dillerine terjime edilýär. Gündogaryň beýik akyldary Magtymguly Pyragynyň arzuwlan zamanasynda ýaşamak, berkarar döwletimiziň ajaýyp ösüşlerine guwanmak, oňa goşant goşmak biz üçin uly bagtdyr. Şeýle bagtyýarlyga ýetiren Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak bolsun!

Gülşirin ÇARYGULYÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Diller kafedrasynyň mugallymy.