Uly üstünliklere beslenýän Arkadag Serdarly bagtyýar ýaşlar ýylynda hormatly Prezidentimiziň alyp barýan oňyn syýasaty esasynda bagtyýar halkymyz eşretli durmuşyň hözirini görüp, rowaçlyklaryň batly gadamlaryna buýsanyp ýaşaýar. Şeýle ösüşdir özgertmeleriň rowaç bolýan zamanasynda ýaşap, zähmet çekip, taryhy wakalara şaýat bolmak bagtyýarlygyň alamatydyr.

Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda ýurdumyzda bilimli, sagdyn bedenli, ýokary ahlakly ýaş nesli terbiýelemek meselesine uly ähmiýet berilýär. Ýaş nesilleriň dünýä derejesinde bilim almaklaryny üpjün etmek häzirki zamanyň talaplaryna laýyklykda ösýän bilim ulgamynyň infrastrukturasyna, şeýle hem bu ulgamy düzgünleşdirýän döwrebap kanunçylyk binýadyna baglydyr.

Bu döwürde milli ykdysadyýetimiziň ähli pudaklarynda özgertmeler üstünlikli amala aşyrylyp, ýurdumyzy durmuş-ykdysady taýdan ösdürmekde, halkymyzyň ýaşaýyş-durmuş derejesini ýokarlandyrmakda, Garaşsyz hemişelik Bitarap Türkmenistan Watanymyzyň şan-şöhratyny dünýä ýüzüne ýaýmakda guwandyryjy netijeler gazanylýar. Arkadagly Prezidentimiziň ýolbaşçylygynda ýurdumyzy ykdysady, syýasy we medeni taýdan ösdürmek boýunça gazanylýan şol üstünlikler ýurt abadançylygyny, döwlet berkararlygyny, il agzybirligini üpjün edýär.

Häzirki döwürde asyrlaryň jümmüşinden gözbaş alyp gaýdýan ýol-ýörelgelerimizi, däp-dessurlarymyzy täzeden dikeltmäge, medeni we ruhy mirasymyzy aýap saklamaga, halkymyzyň baý mirasyny giňişleýin öwrenmäge giň mümkinçilikler döredilýär. Dana hem merdana ata-babalarymyz asyrlardan-asyra, nesillerden-nesle geçirip, bu günki bagtyýar nesillerimize baý hem kämil, haýran galdyryjy we buýsanç dörediji mirasy peşgeş berdiler. Şol miras bolsa umumadamzat gymmatlygynyň aýrylmaz bölegine öwrülip, ony dörediji halkymyza şöhrat getirýär. Öz gözbaşyny Oguz handan alyp gaýdýan taryhymyza, döredijiligimize ser salanymyzda hem ata Watan, ene toprak, ar-namys üçin öz şirin janlaryny gurban eden gerçeklerimiziň, beýik şahsyýetlerimiziň bolandygyny biz bilýäris. Dünýäniň ençeme ýurtlarynyň, şol sanda öz döwletimiziň muzeýlerinde we ýurdumyzyň welaýatlaryndaky muzeýlerde aýawly saklanýan gymmmatlyklarymyz türkmen halkynyň aň-paýhas taýdan-da, döredijilik babatda-da ösen, kämillik, ussatlyk derejesine ýeten beýik halkdygyny dünýä aýan edýär.

Hormatly Prezidentimiziň baştutanlygynda bu täze taryhy eýýamda  gymmatly mirasymyzy öwrenmekde, geljekki nesillere ýetirmekde hem-de dünýä ýaýmakda bilim işgärleri arman-ýadaman zähmet çekýärler. Bu işler bolsa halkymyzyň, aýratyn-da ýaş nesilleriň kalbynda eziz Watanymyza söýgi, onuň şöhratly taryhyna, baý mirasyna buýsanç döredýär.

Arkadagly Prezidentimiz özüniň her bir çykyşynda şu günki ýaş nesliň zamanabap bilimli, hünärli, medeniýetli şol bir wagtda-da binýady milli köklerimizden gaýdýan häzirki zamanyň watansöýüji, zähmetsöýer adamlary bolup ýetişmelidigi barada nygtaýar. Bu ugurda diňe bir mugallymlardyr bilim işgärleriniň däl-de, ýurdumyzyň jemgyýetçilik guramalarynyň, hukuk goraýyş, saglyk edaralarynyň, ýaşuly nesliň wekilleriniň, il içinde abraýdan peýdalanýan döredijilik adamlarynyň el-ele berip agzybirlikli işlemelidiklerini belleýär.

Atalaryň päk zähmetinden, eneleriň mähir-mylakatyndan görelde alýan nesiller watansöýer, päk ahlakly, belent adamkärçilikli, kämil hünärli, ylym-bilimli ýaşlar bolup ýetişýärler. Olar döwlet derejeli bäsleşiklere, dünýä derejeli olimpiadalara gatnaşyp, altyn, kümüş, bürünç medallara eýe bolýarlar. Şeýle ýaşlar bolsa eziz Watanymyzyň geljegidir we kuwwatydyr. Watançy ýaşlaryň irginsiz yhlasy, päk zähmeti, erjelligi, ylmy gözlegleri bilen köpýyllyk maksatnamalaryň üstünlikli amala aşjakdygyna şek-şübhe bolup bilmez. Şu nukdaýnazardan çemeleşilende, ösüp gelýän ýaş nesliň döwrebap bilim we terbiýe alyp, özünde milli ynsançylyk, adamkärçilik medeniýetini kemala getiren, dünýä gymmatlyklaryndan habarly, Watanymyzyň ertirki gülläp ösüşlerine mynasyp goşant goşjak ezber hünärmenler bolup ýetişmegi ähli türkmen halkynyň öňünde möhüm wezipe bolup durýar.

Berkarar döwletiň täze eýýamynyň Galkynyşy döwründe Türkmenistanyň Garaşsyzlygyny we özygtyýarlygyny has-da şöhratlandyrmak, durnukly ösüşi üpjün etmek babatda ýurdumyzyň öňe sürýän başlangyçlarynyň umumadamzat ähmiýetini giňden ýaýmak, milli mirasymyza sarpa goýmak arkaly eziz Watanymyzy mundan beýläkde özgertmek, şan-şöhratyny we halkara abraýyny artdyrmak, ýaş nesli Garaşsyz, hemişelik Bitarap Türkmenistana, milli mirasymyza çäksiz buýsanç, söýgi we hormat goýmak ruhunda terbiýelemek ugrunda alyp barýan işlerimizde biz ylym-bilim işgärleri öz gujur-gaýratymyzy gaýgyrman zähmet çekeris.

Ata-babalarymyzdan dowam edip gelýän milli ýörelgelerimizi häzirki ajaýyp döwrümizde uly rowaçlyklara atarýan hormatly Prezidentimize köp sagbolsun aýdýarys. Gahryman Arkadagymyzyň hem-de Arkadagly Serdarymyzyň janlarynyň sag, ömürleriniň uzak bolmagyny, Watanymyzy özgertmekde we beýgeltmekde alyp barýan il-ýurt bähbitli, döwlet ähmiýetli işlerinde rowaçlyklaryň we üstünlikleriň hemra bolmagyny arzuw edýäris!

Ybraýym DURDYÝEW,
Türkmenistanyň Inžener-tehniki we ulag kommunikasiýalary institutynyň Ykdysadyýet we dolandyryş fakultetiniň Ykdysadyýet we dolandyryş hünäriniň 4-nji ýyl talyby.