Gahryman Arkadagymyz: «Biziň döwletimiziň gazanýan üstünlikleri ýaşlarymyzyň bagtyýar durmuşy bilen berk baglydyr. Ýaşlar eziz Watanymyzyň güýç-kuwwatyny, mümkinçiliklerini, at-abraýyny we beýik geljegini özünde jemleýär» diýmek bilen, türkmen ýaşlarynyň dünýä ösüşleri bilen aýakdaş gitmelidigini, häzirki zamanyň ösen tehnologiýalaryndan oňat baş çykaryp bilmelidigini yzygiderli nygtaýar. Özleri hakynda edilýän aladalara mynasyp jogap bermek bilen, bu gün ýaşlarymyz döwlet, häkimiýet we dolandyryş edaralarynda, halk hojalygynyň dürli pudaklarynda, hususy ulgamda yhlasly zähmet çekýärler, durmuş ugurly döwlet maksatnamalarynyň amala aşyrylyşyna işjeň gatnaşýarlar. Bu bolsa ýaşlaryň islendik döwletiň ykdysady ösüşinde hem aýratyn orun tutýandygyny görkezýär. Watanymyzyň beýik geljeginiň, halkymyzyň bagtyýarlygynyň bähbidine has-da yhlasly okamak, öwrenmek, döretmek we bildirilýän ynama mynasyp bolmak türkmen ýaşlarynyň baş maksady, mizemez ýol-ýörelgesidir.

Türkmen halkynyň Milli Lideri Gahryman Arkadagymyz akyldar şahyr Magtymguly Pyragynyň döredijiligine iňňän ýokary baha bermek bilen şeýle diýýär: «Türkmen halkynyň taryhynda Azady, Magtymguly, Andalyp, Kemine ýaly çuňňur filosofiýa, ýiti pähim-paýhasa ýugrulan ajaýyp eserleri peşgeş beren söz ussatlary, akyldar-danalar az däl. Nusgawy şahyrlarymyzyň, beýik akyldarlarymyzyň, halk döredijiligiň baý mirasyny öwrenip, ylmy taýdan seljermek we asyl nusgasyny halka ýetirmek, türkmen halkynyň taryhy, medeni mirasy boýunça ylmy barlaglary alyp barmak öňde duran möhüm wezipeleriň biridir».

Türkmen tebigatynyň iň gözel ýerleriniň birinde dünýä inen şahyr öz terjimehalyny şeýle beýan edýär: «Asly — gerkez, ýurdy — Etrek, ady — Magtymgulydyr». Şahyr «Nahana geldiň» goşgusynda diňe bir öz ömri hakda däl, eýsem, ynsan oglunyň döreýşi we ösüş aýratynlyklary dogrusynda söz açýar. Dünýä gelen ynsanyň sözläp, ýöräp, ýakyn-ýady tanap başlaýşy şahyrana beýan edilýär.

Hakykatdan hem Magtymguly Pyragynyň döredijilik ussatlygyna dünýäde ýokary baha berilýär we onuň edebi mirasy barha möhüm ähmiýete eýe bolýar. Şol nukdaýnazardan, onuň goşgularyny öwrenmek ýaş nesillerimize hem örän wajypdyr. Ynsany bezeýän watansöýüjilik, ynsanperwerlik we adalatlylyk ýaly ideýalar şahyryň döredijiliginde giňişleýin beýanyny tapyp, kalplara ruhy lezzet eçilýär. Edebiýatyň taryhynda şygryýet dünýäsinde öçmejek yz goýan dana Pyragynyň şygyrlary häzirki wagtda diňe bir türkmen halkynyň däl, eýsem, adamzat ýaşaýşynyň hem ruhy çeşmesine öwrüldi. Söz ussadynyň agzybirlikde, jebislikde, parahatçylykda, bir supranyň daşyna jem bolup, bir döwlete gulluk etmäge çagyrýan nurana pikirleri, öwüt-nesihatlary bu gün döwletimiziň milli ýörelgesine öwrüldi:

Jeýhun bile Bahry-Hazar arasy,
Çöl üstünden öser ýeli türkmeniň,
Gül-gunçasy gara gözüm garasy,
Gara dagdan iner sili türkmeniň.

Bu gün beýik akyldaryň arzuwlan bagtyýar zamanasy geldi. Onuň ajaýyp arzuwlary hasyl boldy. Baky bagtyýarlyga eýe bolan türkmen halky Gahryman Arkadagymyz bilen Berkarar döwletiň täze eýýamynyň Galkynyşy döwründe döredýär, gurýar, ösüşlerden-ösüşlere barýar. Mälim bolşy ýaly, 2024-nji ýylda beýik şahyryň 300 ýyllyk ýubileý toýy belleniler. Munuň özi Magtymguly Pyraga goýulýan sarpanyň nobatdaky subutnamasy bolar. Häzirki wagtda gurluşygy dowam edýän Magtymguly Pyragynyň ýadygärligi we medeni seýilgäh toplumy bolsa paýtagt şäherimiziň görküne görk goşar. Türkmen halky özüniň dünýä meşhur akyldar şahyryna guwanmaga we buýsanmaga doly haklydyr.

Gahryman Arkadagymyzyň «Döwlet guşy» romanynda beýan edişi ýaly, ýaşajyk Mälikgulynyň Magtymgulynyň «Ýeldim tut» şygryny kolhozçylara okap bermegi diňleýjilerde, aýratyn hem, Berkeli agada ýokary ruhubelentlik döredýär. Onuň: «Her birimiziň gursagymyzda Magtymgulynyň «Ýeldim tuty» bolmaly» diýen sözleri oturanlary biparh goýmaýar. Magtymguly atamyzyň şunuň ýaly ajaýyp setirleriniň täsirlerini Milli Liderimiziň eserlerinden, aýratyn-da, «Pähim-paýhas ummany Magtymguly Pyragy» atly ajaýyp şygryndan tapmak bolýar.

Geljek ýylda beýik akyldar şahyr Magtymguly Pyragynyň doglan gününiň şanly 300 ýyllyk toýuny dünýä derejesinde dabaralandyrjak halkymyz oňa şu günlerden ykjam taýýarlyk görýär. Ol toý pähim-paýhasa, söz sungatyna sarpa goýýan ähli ynsanlaryň toýudyr.

 Çynar BAZARMYRADOWA,
Türkmenistanyň Inžener-tehniki we ulag kommunikasiýalary institutynyň Ykdysdadyýet we dolandyryş fakultetiniň Logistika hünäriniň 2-nji ýyl  talyby.